ह्वाट्सएपले हाल आफ्ना प्रयोगकर्ताहरूको लागि इन्स्टाग्राम प्लस र स्न्यापच्याट प्लसजस्ता नयाँ सशुल्क सदस्यता योजना ‘ह्वाट्सएप प्लस’ को परीक्षण गरिरहेको छ। यो अतिरिक्त सेवा मुख्य रूपमा एपको सजावट र व्यक्तिगत अनुकूलनमा केन्द्रित छ। यसअन्तर्गत प्रयोगकर्ताले रकम तिरी कस्टमाइज्ड आइकन, थिम, रिङ्टोन र अन्य सुविधा उपयोग गर्न पाउनेछन्। मेटाका प्रवक्ताले यसको पुष्टि गर्दै प्रिमियम सुविधाहरूमा २० वटासम्म च्याट पिन गर्न सकिने, विशेष च्याट थिम र नयाँ सूचना टोन समावेश हुने बताएका छन्।
तर, गत वर्षदेखि ह्वाट्सएपको ‘स्टाटस’ मा देखिन थालेका विज्ञापनहरू हटाउने विषयमा यो योजना अन्तर्गत कुनै उल्लेख गरिएको छैन। यसको मूल्यबारे कम्पनीले आधिकारिक घोषणा नगरे पनि विभिन्न रिपोर्टहरूका अनुसार युरोपमा मासिक २.४९ युरो र पाकिस्तानमा ०.८२ युरो हुन सक्ने अनुमान गरिएको छ। ह्वाट्सएपले सुरुमा केहि सीमित प्रयोगकर्ताहरूका लागि एक महिनाको निःशुल्क ट्रायल पनि उपलब्ध गराइरहेको छ। करिब १० वर्षअघि ह्वाट्सएपले वार्षिक १ डलर शुल्क लिने गरेकोमा फेसबुकले खरिद गरेपछि सन् २०१६ देखि यसलाई पूर्णतः निःशुल्क बनाएको थियो। पछिल्ला वर्षहरूमा ह्वाट्सएप मेटाका लागि आम्दानीको ठूलो स्रोत बनेको छ, जसको वार्षिक राजस्व २ अर्ब डलर नाघिसकेको छ। हाल यो सुविधा सानो समूहमा मात्र परीक्षण भइरहेकोले तत्काल ठूलो प्रभाव नपर्ने अनुमान गरिएको छ।
