पाकिस्तानको बलुचिस्तान प्रान्तको अन्वेषण स्थलमा आक्रमण हुँदा नौ जनाको मृत्यु भएको छ। आक्रमणमा एक जना विदेशी कामदार अपहरण गरिएको सुरक्षा स्रोतहरूले जनाएका छन्। सुरक्षा बलले घटनास्थलमा खोजी अभियान सुरु गरेको र आक्रमणकारीहरू फरार भएका बताएका छन्।
चागी जिल्लामा नेसनल रिसोर्सेज लिमिटेड कम्पनीले सञ्चालन गरेको अन्वेषण तथा अनुसन्धान स्थलमा बुधबार स्थानीय समयअनुसार साँझ ७ बजे आक्रमण भएको छ। तामा र सुनको अन्वेषण गर्ने उक्त स्थलमा भएको आक्रमणलाई स्रोतहरूले पुष्टि गरेका छन्।
आतङ्ककारीहरूले साना हतियार र अन्डर–ब्यारेल ग्रेनेड लन्चर प्रयोग गरी आक्रमण गरेका थिए भने इन्धनमा क्षति पुर्याउँदै तीनवटा शिविरहरूमा आगो लगाएको पनि जनाइएको छ। जवाफी गोलीबारीमा एक जना आतंकवादी मारिएको र बाँकी आक्रमणकारीहरू फरार भएका छन्।
सुरक्षा बलले खोजी तथा अनुसन्धान अभियान जारी राखेको छ। मृतकहरू मध्ये तीन जना निजी सुरक्षा गार्ड र छ जना मजदुर रहेको र अहिलेसम्म कुनै समूहले आक्रमणको जिम्मेवारी नलिएको बताइएको छ।
