स्वास्थ्यकर्मीमाथि अभद्र व्यवहार गर्ने युवाले माफी मागेपछि स्वास्थ्य सेवा पुनः नियमित
कणार्ली स्वास्थ्य विज्ञान प्रतिष्ठानका स्वास्थ्यकर्मीमाथि अभद्र व्यवहार गर्ने युवाले माफी मागेपछि अस्पतालको सेवा पुनः नियमित भएको छ। युवा अभियन्ता उपेन्द्र बुढथापा र नरेन्द्र बुढथापाले चिकित्सकलाई असुरक्षित महसुस हुने कुनै पनि कार्य नगर्ने लिखित प्रतिबद्धता जनाएका छन्। स्वास्थ्यकर्मीले सुरक्षाको प्रत्याभूति माग्दै आकस्मिक बाहेकका सेवा ठप्प पारेपछि वार्ताको सहजीकरणमा सेवा पुनः सुरु भएको छ। १० वैशाख, काठमाडौं।
बुधबार ड्युटीमा रहेका स्वास्थ्यकर्मीमाथि ती युवा अभियन्ताले दुर्व्यवहार र धम्की दिएका थिए। त्यसपछि स्वास्थ्यकर्मीहरूले सुरक्षाको प्रतिवद्धता माग्दै बिहीबार बिहानदेखि आकस्मिक बाहेकका सेवा ठप्प पारेका थिए। प्रतिष्ठानका रजिष्ट्रार तथा प्रवक्ता लक्ष्मीचन्द्र महतका अनुसार अभद्र व्यवहार गर्ने युवाहरू र स्वास्थ्यकर्मीबीच सहमति भएपछि प्रतिष्ठानको सम्पूर्ण सेवा पुनः नियमित भएको छ।
‘युवाहरूले आफूले गरेको गल्ती महसुस गरी अबदेखि यस्तो व्यवहार नगर्ने भन्दै माफी मागेका छन्,’ महतले भने, ‘पीडित (डाक्टर) ले विषयलाई अत्यधिक नचर्काएर सम्झौतामा पुगेका छन्। त्यसपछि सेवा पुनः नियमित भएको हो।’ सामाजिक अभियन्ताको नाममा केही युवाहरूले प्रतिष्ठानका विभिन्न विभागमा पुगेर स्वास्थ्यकर्मीलाई गालीगलौज र धम्की दिएका थिए र त्यसले वातावरण तनावपूर्ण बनाएको थियो। स्वास्थ्यकर्मीले सेवा ठप्प पारेपछि बिहान १० बजेदेखि वार्ताको सुरुवात भएको थियो। प्रतिष्ठानका उपकुलपति डा. पुजन रोकाया, रजिष्ट्रार महत, डीन डा. प्रेनित पोखरेल र विवेक पुन मगरलगायतको टोलीले सहजीकरण गरेको थियो।
