सरकारले काठमाडौंको थापाथली, गैरीगाउँ र मनोहरा क्षेत्रबाट हटाइएका सुकुमवासीलाइ १५ दिनभित्र स्थायी बसोवासको व्यवस्था गर्ने भएको छ। सुकुमवासीलाई शनिबार र आइतबार तीन नयाँ स्थानमा सार्ने तयारी गरिएको प्रधानमन्त्री कार्यालय स्रोतले जानकारी दिएको छ। वास्तविक र अवास्तविक सुकुमवासी छुट्याउने कार्य १५ दिनभित्र सकिने र वास्तविकलाई स्थायी बसोवास दिने योजना रहेको छ। १० वैशाख, काठमाडौं।
काठमाडौंका तीन स्थानबाट हटाइएका ‘वास्तविक सुकुमवासी’लाई सरकारले १५ दिनभित्र स्थायी बसोवासको व्यवस्था गर्ने निर्णय गरेको छ। थापाथली, गैरीगाउँ र मनोहरा क्षेत्रमा बसोवास गरिरहेका सुकुमवासीलाइ शनिबार र आइतबार ती ठाउँबाट तीन फरक स्थानमा अस्थायी बसोवास गराउने तयारी छ। प्रधानमन्त्री तथा मन्त्रिपरिषद् कार्यालय स्रोत अनुसार सरकारले पूर्व तयारीसहित मात्र सुकुमवासीलाइ सार्ने योजना बनाएको हो।
प्रधानमन्त्री कार्यालय स्रोतले भने, ‘सुकुमवासीलाई बिना पूर्व तयारी नै सार्ने भनी समाचारहरू आएका छन्, जुन सहि होइन। व्यवस्थित तरिकाले सार्ने तयारी भईरहेको छ।’ शुक्रबार साँझसम्म बसोबास गरिएको स्थान छोड्न सुरक्षाकर्मीले माइकिङ गरेर आग्रह गरेका थिए। सरकारले ती तीन स्थानबाट सुकुमवासीलाइ हटाउने भएपछि कतिपयले शुक्रबार बिहानदेखि नै स्थान छोड्न सुरु गरेका छन्।
‘यो विषय वास्तविक सुकुमवासीहरुको हो। सुकुमवासी हुँ भन्दै बस्ने घरजग्गा भएका पनि छन्,’ प्रधानमन्त्री कार्यालय स्रोतले भने, ‘हामी वास्तविक सुकुमवासीलाइ उचित व्यवस्था दिनेछौं, नाममा बस्नेहरुलाई हटाउने हो।’ शनिबार र आइतबार ती स्थानबाट सारिएका सुकुमवासीलाइ काठमाडौंका तीन फरक स्थानमा राखिने छ। अहिले बसोबास गरेको ठाउँभन्दा बस्न र खानाको राम्रो व्यवस्था गरिने भन्दै प्रधानमन्त्री कार्यालयले जानकारी दिएको छ।
