१२ वैशाख, हेटौँडा । सत्तारुढ दलहरूबीच सहमति नबन्दा बागमती प्रदेशसभाको सभामुख चयन प्रक्रिया अनिश्चिततामा परेको छ। रिक्त सभामुख पदमा सत्तारुढ नेपाली कांग्रेस र नेकपा (एमाले)ले दाबी नरोक्दा सहमति हुन सकेको छैन। बागमती प्रदेशसभाका सभामुख भुवनकुमार पाठकले जेनजी आन्दोलनपछि गत असोज १ गते सभामुख पदबाट राजीनामा दिएपछि यो पद खाली भएको थियो। प्रदेशसभाको बैठक बसेको १५ दिनभित्र सभामुख चयन गर्नुपर्ने संवैधानिक व्यवस्था रहेको छ।
वैशाख ८ गते सभामुख चयन प्रक्रिया अघि बढाउने तयारी भए पनि दलहरू बीच सहमति नहुनुले ढिलाइ भएको नेपाली कांग्रेस बागमती प्रदेशसभा संसदीय दलका सचेतक पुकार महर्जनले बताए। रिक्त सभामुख पदमा सत्तारुढ र प्रतिपक्षका दलहरूले अलग-अलग दाबी अघि सारेका छन्। प्रदेशसभाको सबैभन्दा ठूलो दलको रूपमा आफ्नो पार्टीले सभामुख पाउनुपर्ने दाबी कांग्रेसका सचेतक महर्जनले व्यक्त गरे। ‘एमालेले पनि सभामुख दाबी गरिरहेको छ, हामी दुबै सत्तारुढ दलको सहमति बनाएर अगाडि बढ्न चाहन्छौं,’ उनले भने, ‘ठूलो दलको रूपमा कांग्रेसलाई सभामुख दिनुपर्छ।’
सत्तारुढ दलहरूबीच सहमति कायम गरेर प्रक्रिया अघि बढाउने उनको भनाइ छ। अर्को सत्तारुढ दल एमालेले कांग्रेसबाट मुख्यमन्त्री भएकाले सभामुख आफ्नो दलले पाउनुपर्ने दाबी गरिरहेको छ। एमाले संसदीय दलका प्रमुख सचेतक एकालाल श्रेष्ठले कांग्रेसबाट मुख्यमन्त्री भएकाले सभामुख एमालेको दाबी रहेको र यसमा दुई दलबीच विवाद नरहेको बताए। प्रदेशसभामा सबै दलबीच सहमति गरेर सभामुख चयन गर्न खोज्ने क्रममा केही ढिलाइ भएको उनको भनाइ छ।
नेपाली कम्युनिष्ट पार्टीका नेता शालिकराम जम्कट्टेलले सरकार र सदनबीच सन्तुलन कायम राख्न प्रमुख प्रतिपक्ष दलको हैसियतले आफ्नो पार्टीले सभामुख पाउनुपर्ने बताए। सभामुखमा आफ्नो दलको दाबी रहेको बताउँदै उनले सत्तापक्षबीच सहमति नहुँदा आफ्नो दलले उम्मेदवारी दिने बताए। ‘हामी सत्तारुढ दललाई भनिरहेका छौं—’तपाईं सरकार चलाउनुहोस्, सदनको नेतृत्व हामीलाई दिनुहोस्’, नेता जम्कट्टेलले भने, ‘शक्ति सन्तुलनका लागि प्रतिपक्षको दाबी स्वाभाविक हो र यसले राम्रो सन्देश दिन्छ। सत्तारुढ दलबीच कुरा मिल्यो भने राम्रो, नत्र हामीले उम्मेदवारी दिन्छौं।’ राष्ट्रिय प्रजातन्त्र पार्टी (रास्वपा)ले पनि सभामुख पदमा आफ्नो पार्टीको दाबी गरेको छ। रास्वपा संसदीय दलका नेता उद्धव थापाले आफ्नो पार्टीबाट सभामुख भएका पाठकले राजीनामा दिएपछि सभामुख फेरि आफ्नो दलले पाउनुपर्ने बताए। एक सय चार सदस्यीय बागमती प्रदेशसभामा नेपाली कांग्रेसका ३५, नेकपा एमालेका २५, नेपाली कम्युनिष्ट पार्टीका २६, राष्ट्रिय प्रजातन्त्र पार्टीका १३, नेपाल मजदुर किसान पार्टीका तीन र हाम्रो नेपाली पार्टीका दुई सदस्य छन्।
