नेपाल शिक्षक महासंघद्वारा रास्वपा सांसद पोखरेलको प्रधानाध्यापकप्रति व्यवहारको कडा निन्दा

१२ वैशाख, काठमाडौं । रास्वपा सांसद विश्वराज पोखरेलले आफ्नो गृह जिल्लाका एक प्रधानाध्यापकमाथि देखाएको व्यवहारप्रति नेपाल शिक्षक महासंघले कडा निन्दा जनाएको छ । शनिबार महासंघका अध्यक्ष लक्ष्मीकिशोर सुवेदी र महासचिव तुलाबहादुर थापाले एक विज्ञप्ति जारी गर्दै विद्यालयभित्र पसेर प्रधानाध्यापकमाथि गरिएको व्यवहारको घोर निन्दा गरेका छन् ।

‘माननीय विश्वराज पोखरेलले २०८३ वैशाख १० गते श्री चण्डेश्वरी मावि, सिजिदेम्बा–२, ओखलढुंगाका प्रधानाध्यापक सन्तबहादुर मगरमाथि देखाएको धम्कीपूर्ण र अपमानजनक व्यवहारप्रति हाम्रो ध्यानाकर्षण भएको छ,’ विज्ञप्तिमा भनिएको छ, ‘हरेक पदाधिकारीको आफ्नो पदीय जिम्मेवारी र क्षेत्राधिकार हुन्छ । यस्ता कुरा बिर्सिएर माननीय पोखरेलले विद्यालयभित्र प्रधानाध्यापकमाथि गरेको अशोभनीय व्यवहारले शैक्षिक क्षेत्रको गरिमा र स्वतन्त्रतामाथि गम्भीर चोट पुर्‍याएको छ भने जननिर्वाचित प्रतिनिधिको गरिमा र विश्वाससमेत ह्रास भएको हाम्रो ठहर छ ।’

उक्त घटनाको तीव्र निन्दा गर्दै शिक्षक महासंघले शिक्षा क्षेत्रको मर्यादा र स्वायत्ततालाई सम्मान गर्न सबैलाई आग्रह गर्दै भविष्यमा यस्ता अभद्र व्यवहार नगर्न चेतावनी दिएको छ ।