सर्वोच्च अदालतले नेपाली कांग्रेसको कानुनी विवाद टुङ्ग्याए पनि पार्टीभित्रको राजनीतिक द्वन्द्व रहिरहेकै छ। असन्तुष्ट समूहले १५ वैशाखमा धुम्बाराहीस्थित होटल स्मार्टमा भेला आह्वान गरेको छ। सभापति गगन थापाले असन्तुष्ट पक्षसँग समन्वय गर्न निवर्तमान कार्यवाहक सभापति पूर्णबहादुर खड्कासँग छलफल गरेको बताएका छन्। १२ वैशाख, काठमाडौं – सर्वोच्च अदालतले नेपाली कांग्रेसभित्रको कानुनी विवाद टुङ्ग्याए पनि पार्टीभित्रको राजनीतिक द्वन्द्व भने कायमै छ। अदालतको फैसलापछि संस्थापन पक्षले मेलमिलापको पहल नगरेको आरोप लगाएपछि असन्तुष्ट पक्ष थप रणनीतिक तयारीमा जुटेको छ। निवर्तमान कार्यवाहक सभापति पूर्णबहादुर खड्काको नेतृत्वमा असन्तुष्ट समूहले १५ वैशाखमा भेला बोलाएको छ। धुम्बाराहीस्थित होटल स्मार्टमा आयोजना गरिने उक्त भेलामा निवर्तमान केन्द्रीय सदस्यहरू, जिल्ला सभापतिहरू र क्षेत्रीय सभापतिहरूलाई आह्वान गरिएको छ।
सर्वोच्च अदालतले गगन थापाको नेतृत्वलाई वैधानिकता दिएकोपछि इतर समूह सुरक्षात्मक भएको छ र उनले सुरुमा ‘पर्ख र हेर’ को रणनीति अपनाएका थिए। ६ वैशाखमा धुम्बाराहीमै खड्काले निवर्तमान केन्द्रीय सदस्यहरूसँग बैठक गरेका थिए। ५ वैशाखमा गल्फुटारस्थित आफ्नै निवासमा शीर्ष नेताहरूसँग छलफल गरेका खड्कालाई भोलिपल्ट सभापति थापाले भेटेका थिए। खड्का निवासमा भएको उक्त भेटवार्तामा के कुराकानी भयो भन्ने अहिलेसम्म सार्वजनिक भएको छैन। कांग्रेस महामन्त्री गुरुराज घिमिरेले असन्तुष्ट समूहलाई मिलाउन सभापति थापाले निवर्तमान कार्यवाहक सभापति खड्कासँग भेटवार्ता गरेको बताएका छन्। ‘कार्यसम्पादन समितिले असन्तुष्ट समूहलाई मिलाउने जिम्मा सभापतिलाई दिएको छ,’ उहाँले भने, ‘त्यसअन्तर्गत उहाँले पूर्वउपसभापति पूर्णबहादुर खड्कासँग भेटेर कुराकानी गर्नुभयो।’
सम्बन्धित खबर
