पूर्वाधार विकास समितिले अलपत्र अवस्थामा रहेका पूर्वाधार आयोजनाहरूको व्यवस्थापन समयमै सम्पन्न गर्न सरकारलाई निर्देशन दिएको छ। सभापति आशिष गजुरेलले आगामी परियोजनाहरूमा विगतका कमजोरीहरू नदोहरियोस भनि नीतिगत सुधार आवश्यक रहेको बताए। समितिले राष्ट्रिय गौरवका आयोजना सम्बन्धी प्रगति र समस्याहरूको समाधानका लागि उपसमिति गठन गरेको छ। १५ वैशाख, काठमाडौं।
पूर्वाधार विकास समितिले मंगलबार सिंहदरबारमा बसेको प्रतिनिधिसभाअन्तर्गतको समितिको बैठकमा विकास निर्माणका परियोजनाहरूलाई तत्काल व्यवस्थित गर्न सरकारलाई निर्देशन दिएको छ। उनले आगामी दिनमा शुरु हुन लागेको परियोजनामा विगतका कमजोरी नदोहरिनेगरी नीतिगत सुधार गर्नुपर्ने बताए। नियम, प्रक्रिया र कार्यान्वयन तहमा रहेका अस्पष्टता र त्रुटिहरूको गहिरो अध्ययन गरी समितिले सरकारलाई ठोस सुझाव र निर्देशन दिने उनको भनाइ छ।
गजुरेलले विकास निर्माणका सन्दर्भमा सरकार समितिप्रति जवाफदेही हुनुपर्ने बताए। मन्त्री र सचिवहरूले संसदीय समितिमा उपस्थित भई स्पष्ट जवाफ दिनु आवश्यक रहेको उनको भनाई छ। उनले भने, ‘अलपत्र परेका पूर्वाधारहरूको व्यवस्थापन हुनुपर्छ र समयमा नै काम सम्पन्न हुनुपर्छ। आगामी परियोजनाहरूमा विगतका गल्तीहरू दोहोरिन दिइनु हुँदैन।’
समितिले कुनै दबाबमा नपरी स्वतन्त्र रूपमा काम गर्ने प्रतिबद्धता पनि जनाएको छ। ‘सरकारका मन्त्री र सचिवहरूले पनि समितिमा आएर जवाफ दिनुपर्छ। संसदीय समितिको अनुगमनमा मन्त्री र सचिवले उपस्थित नहुने विकल्प हुँदैन,’ उनले भने। समितिले राष्ट्रिय गौरवका आयोजना सम्बन्धी प्रगति, देखिएका समस्या र उनीहरूको समाधानका लागि प्रतिवेदन तयार गर्न उपसमिति पनि गठन गरेको छ।
