१७ वैशाख, काठमाडौं। अमेरिका र इजरायलले इरानमाथि आक्रमण सुरु गरेपछि उत्पन्न तनावका कारण कच्चा तेलको मूल्य चार वर्षयताकै उच्चतम स्तरमा पुगेको छ। ताजा तथ्यांक अनुसार कच्चा तेलको मूल्य ११९.७६ डलर प्रति ब्यारेल पुगेको छ। यो सन् २०२२ को जुन महिनामा देखिएको सबैभन्दा उच्च स्तर हो। रुस–युक्रेन युद्धको समयमा सन् २०२२ को फेब्रुअरी–मार्चमा कच्चा तेलको मूल्य करिब १३० डलर प्रति ब्यारेल पुगेको थियो।
द गार्जियनका अनुसार, कच्चा तेलको मूल्य अहिले उच्च हुनुमा अमेरिकी पूर्वराष्ट्रपति डोनाल्ड ट्रम्पका पछिल्ला अभिव्यक्तिहरूले पनि भूमिका खेलेको छ। ट्रम्पले इरानका बन्दरगाहहरूमा सैन्य नाकाबन्दी निरन्तरता दिने बताएका छन्। उनले इरानले आफ्नो परमाणु सम्झौता पुरा नगरेसम्म नाकाबन्दी जारी राख्ने स्पष्ट पारेका छन्। यसको सिधा प्रभाव स्ट्रेट अफ होर्मुज समुद्री मार्गमा परेको छ। इरानले नियन्त्रित स्ट्रेट अफ होर्मुज विश्वभर तेल ढुवानी हुने महत्वपूर्ण जलमार्ग हो। यहाँ अमेरिका र इरानबीच बेलाबेला आक्रमणका घटनाहरू भइरहेका छन्।
असुरक्षाका कारण सयौं तेल ट्यांकर र पानीजहाजहरू अलपत्र परेका छन्। जसका कारण विश्वव्यापी तेल र ग्याँसको ढुवानी प्रभावित हुँदै महँगी वृद्धिमा जोडिएको छ। तनाव समाप्त गर्न अमेरिका र इरानका प्रतिनिधिहरूबीच पाकिस्तानमा वार्ता पहल भइरहे पनि अहिलेसम्म कुनै ठोस नतिजा आएको छैन।
