कांग्रेस संसदीय दलका नेता आङदेम्बेले तमोर कोरिडोरको निर्माणाधीन पुलको निरीक्षण गरे

२२ वैशाख, काठमाडौं । प्रमुख प्रतिपक्षी नेपाली कांग्रेस संसदीय दलका नेता भीष्मराज आङ्देम्बेले तमोर कोरिडोर सडक खण्डमा निर्माणाधीन पुलहरूको स्थलगत निरीक्षण गरेका छन्। निरीक्षणका क्रममा सडक कालोपत्रे भइसके पनि पुल निर्माणको काम अलि सुस्त गतिमा अगाडि बढिरहेको पाइएपछि उनले निर्माण कम्पनीप्रति असन्तुष्टि व्यक्त गरे। वर्षायाममा बाढीका कारण सवारी आवागमन अवरुद्ध हुने समस्या बारम्बार दोहोरिएपछि उनले काम तीव्रगतिको बनाउन निर्देशन दिएका छन्। नेता आङ्देम्बेले भने, ‘बजेटको लागि पहल गर्ने म छु, तर यहाँ काम छिटो सम्पन्न हुनुपर्छ।’ पूर्वी पहाडलाई तराईसँग जोड्ने महत्वपूर्ण मार्गका रूपमा चिनिने तमोर कोरिडोरलाई ‘लाइफलाइन सडक’ मानिन्छ। तथापि, लखुवा, नावाखोला, रगुवा, र छरु लगायत खोलामा पुल निर्माण ढिलाइका कारण वर्षायाममा सवारी आवागमन प्रभावित हुँदै आएको छ। खोलामा पानी बढ्दा सवारी साधन बग्ने वा डुब्ने जोखिमसमेत बढिरहेको स्थानीयले गुनासो गरेका छन्। जनताले वर्षौंदेखि भोग्दै आएको समस्याप्रति गम्भीरता जनाउँदै नेता आङ्देम्बेले पुल निर्माणको जिम्मा लिएको कम्पनीका प्रतिनिधिहरूलाई काममा ढिलासुस्ती नगर्न सचेत गराएका छन्। उनले आवश्यक बजेट व्यवस्थापनका लागि आफूले पहल गर्ने प्रतिबद्धता पनि व्यक्त गरेका छन्।