२३ वैशाख, विराटनगर । सुनसरीको बराहक्षेत्रबाट प्रहरीले गाँजा लोड गरिएको भारतीय नम्बर प्लेटको एम्बुलेन्स नियन्त्रणमा लिएको छ। एम्बुलेन्समा सवार दुई जनालाई पनि पक्राउ गरिएको छ। प्रहरीले जानकारी दिएको अनुसार, बराहक्षेत्र नगरपालिका-२, पुल्ठेगौंडाबाट मंगलबार बीआर ०७ पीसी ४७६५ नम्बरको एम्बुलेन्सभित्र प्लास्टिकका बोरामा राखिएको अवस्थामा १४८ किलो गाँजा फेला परेको हो। जिल्ला प्रहरी कार्यालय सुनसरीका प्रहरी सूचना अधिकारी डीएसपी चन्द्रबहादुर खड्काका अनुसार एम्बुलेन्स चालक भारतको बिहार राज्य सुपौल जिल्लाको वीरपुरका १८ वर्षीय धर्मेन्द्रकुमार यादव र एम्बुलेन्समै सवार वीरपुरका २१ वर्षीय मोहम्मद सदाम पक्राउ परेका छन्। प्रहरीले एम्बुलेन्सको प्रयोग गरेर भारततर्फ गाँजाको तस्करी गर्न खोजिएको हुनसक्ने आशंका व्यक्त गरेको छ। पक्राउ परेकाहरूमाथि थप अनुसन्धान भइरहेको प्रहरीले जनाएको छ।
सम्बन्धित खबर
