कीर्तिपुरमा दिउँसै धारिलो हतियार प्रहार गरी विपिन घिमिरेको हत्या गरेको आरोपमा तीन जनालाई प्रहरीले पक्राउ गरेको छ। पक्राउ पर्नेमा आशिष महर्जन, रोशन बोहोरा र रबिन धामी रहेका छन्। हत्या कीर्तिपुर नगरपालिका–१० पोडेटोल क्षेत्रमै भएको थियो भने घाइते घिमिरेलाई अस्पताल लगिँदा चिकित्सकले उनको मृत्यु पुष्टि गरेका थिए। २३ वैशाख, काठमाडौं।
कीर्तिपुरमा दिउँसै एक युवकमाथि धारिलो हतियार प्रयोग गरी हत्या गरिएको घटनामा प्रहरीले तीन जनालाई नियन्त्रणमा लिएर सोधपुछ गरिरहेको छ। प्रहरीका माथिल्लो स्रोतका अनुसार कीर्तिपुर नगरपालिका–९ हनुमानघाट बस्ने २२ वर्षीय आशिष महर्जन, बैतडीको डिलासैनी गाउँपालिका–३ घर भएका र अहिले कीर्तिपुर ट्याङ्लाफाँट बसोबास गर्ने २१ वर्षीय रोशन बोहोरा तथा कैलालीको बर्दगोरिया गाउँपालिका–४ घर भएका कीर्तिपुर पांगा दोबाटो बस्ने २३ वर्षीय रबिन धामीलाई केही समय नियन्त्रणमा राखेर सोधपुछ गरिएको छ।
जिल्ला प्रहरी परिसर काठमाडौंका एसपी पवनकुमार भट्टराईका अनुसार बुधबार दिउँसो साढे २ बजे गुल्मी धुर्कोट घर भएका र कीर्तिपुरमा बसोबास गरिरहेका विपिन घिमिरेमाथि धारिलो हतियार प्रहार गरिएको थियो। गम्भीर घाइते भएका घिमिरेलाई तत्काल कीर्तिपुर अस्पताल पुर्याइयो, जहाँ चिकित्सकले उनको मृत घोषणा गरे। प्रहरीका अनुसार घटना साथीबीचको झगडाबाट उत्पन्न भएको हो।
