सरकारी लगानी भएका सबै बैंकका अध्यक्षहरूले पदबाट राजीनामा दिएका छन्। सरकारले सार्वजनिक पदमा राजनीतिक नियुक्ति भएका व्यक्तिलाई बर्खास्त गरेपछि बैंकका अध्यक्षहरूले राजीनामा दिएका हुन्। राष्ट्रिय वाणिज्य बैंक, कृषि विकास बैंक र नेपाल बैंकका अध्यक्षहरूले राजीनामा दिएका छन्। २४ वैशाख, काठमाडौं।
सरकारको सार्वजनिक संस्थामा राजनीतिक नियुक्ति भएका व्यक्तिलाई बर्खास्त गर्ने निर्णय पश्चात बैंकका अध्यक्षहरूले राजीनामा दिएका हुन्। अर्थ मन्त्रालयका स्रोतका अनुसार राष्ट्रिय वाणिज्य बैंकका अध्यक्षसहित सबै सञ्चालकहरूले राजीनामा दिएका छन्। कृषि विकास बैंक र नेपाल बैंकमा भने अध्यक्षले मात्र राजीनामा दिएका छन्।
राष्ट्रिय वाणिज्य बैंकको अध्यक्षको पदमा नेपाल राष्ट्र बैंकका पूर्वकार्यकारी निर्देशक देवकुमार ढकाल थिए। अन्य सञ्चालकमा थानप्रसाद पँगेनी, लक्ष्मण घिमिरे, प्रा. डा. रामप्रसाद ज्ञवाली, रोमिला ढकाल उप्रेती, डा. सूर्यबहादुर राना र हरिकुमार सिलवाल रहेका छन्। कृषि विकास बैंकका अध्यक्ष डिमप्रसाद पौडेल थिए भने नेपाल बैंकमा प्रा. डा. डिल्लीराज शर्मा थिए। सरकारले सार्वजनिक पदमा राजनीतिक नियुक्ति भएका व्यक्तिलाई पदमुक्त गर्न ल्याएको अध्यादेश नेपाल राष्ट्र बैंक र सरकारी बैंकहरूको हकमा बाध्यकारी थिएन, तर ती बैंकका अध्यक्ष र सञ्चालकहरूले सरकारको नीति समर्थन गर्दै राजीनामा दिएका हुन्।
