समाचार सारांश समीक्षित सम्पादकीय। भारत सरकारले सुनपछि ९९.९ प्रतिशत शुद्धता भएका सिल्भर बारलाई ‘फ्री’ श्रेणीबाट ‘रिस्ट्रिक्टेड’ श्रेणीमा राखेर चाँदी आयातमा कडा नीति लागू गरेको छ। सरकारले सुन र चाँदीमा आयात शुल्क ६ प्रतिशतबाट १५ प्रतिशत पुर्याएको छ र एडभान्स अथोराइजेसन स्किमअन्तर्गत सुन आयातमा १०० किलोग्राम सीमा तोकेको छ। पश्चिम एसियाली संकट र बढ्दो तेल मूल्यका कारण विदेशी मुद्रा बचत गर्न भारतले सुन–चाँदी आयातमा कडाइ गरेको हो। ३ जेठ, काठमाडौं ।
पश्चिम एसियामा जारी तनावबीच भारत सरकारले सुनपछि चाँदी आयातमा पनि थप कडा नीति अवलम्बन गरेको छ। भारतको वाणिज्य तथा उद्योग मन्त्रालय अन्तर्गतको विदेश व्यापार महानिर्देशनालयले जारी गरेको सूचनाअनुसार ९९.९ प्रतिशत शुद्धता भएका सिल्भर बारलाई ‘फ्री’ श्रेणीबाट हटाएर ‘रिस्ट्रिक्टेड’ अर्थात् प्रतिबन्धित श्रेणीमा राखिएको छ। साथै अन्य प्रकारका सिल्भर बारलाई पनि प्रतिबन्धित आयात सूचीमा समावेश गरिएको छ। वाणिज्य मन्त्रालयले संशोधन गरेको आयात नीतिअनुसार देशमा चाँदीको आयात नियन्त्रण गर्ने उद्देश्यले यो कदम चालिएको हो।
सूचनामा चाँदी आयातसम्बन्धी नयाँ नियम तत्काल लागू भएको उल्लेख छ। यसअघि सरकारले बहुमूल्य धातुमा लाग्ने आयात शुल्कमा उल्लेखनीय वृद्धि गरेको थियो भने एडभान्स अथोराइजेसन स्किमअन्तर्गत सुन आयातमा १०० किलोग्रामको सीमा पनि तोकेको थियो। पश्चिम एसियाली संकटका कारण बढ्दो आयात खर्चबीच सरकारले सुन र चाँदीमा लाग्ने आयात शुल्क बढाएर १५ प्रतिशत पुर्याएको छ, ताकि अनावश्यक खरिदलाई निरुत्साहित गर्न सकियोस्।
