इरान युद्धसँग सम्बन्धी रुसी राष्ट्रपति पुटिन र युएई राष्ट्रपतिबीच टेलिफोन वार्ता

३ जेठ, काठमाडौं । रुसका राष्ट्रपति भ्लादिमिर पुटिन र संयुक्त अरब इमिरेट्स (युएई) का राष्ट्रपति शेख मोहम्मद बिन जायद अल नह्यानबीच इरान युद्ध र मध्यपूर्वको पछिल्लो अवस्थालाई लिएर टेलिफोन वार्ता भएको छ। रुसको राष्ट्रपतिको कार्यालय क्रेमलिनका अनुसार, दुवै नेताले शान्ति स्थापना गर्न राजनीतिक र कूटनीतिक संवाद निरन्तरता दिन आवश्यक रहेकोमा जोड दिएका छन्।

एमिरेट्स न्युज एजेन्सीका अनुसार शनिबार भएको फोन वार्तामा मध्यपूर्वको पछिल्लो घटनाक्रम र यसले क्षेत्रीय तथा अन्तर्राष्ट्रिय शान्ति र सुरक्षामा पार्ने प्रभावहरूबारे छलफल गरिएको थियो। साथै, उनीहरूले जलमार्गको स्वतन्त्रता, ऊर्जा सुरक्षा र विश्वव्यापी अर्थतन्त्रमा यस संकटले पर्ने असरहरूमाथि विचार आदानप्रदान गरेका छन्। यसै क्रममा दुई देशबीचको रणनीतिक साझेदारीलाई अझ सुदृढ पार्न द्विपक्षीय सहयोग र संयुक्त प्रयासहरूको समीक्षा गरिएको थियो।

पुटिनले रुस र युक्रेनबीचको कैदी आदानप्रदानमा युएईले निरन्तर गर्दै आएको मध्यस्थता प्रयासको लागि धन्यवाद दिएका छन्। उनले युक्रेन युद्धसँग सम्बन्धित मानवीय मुद्दाहरूमा युएईको सकारात्मक सहयोगको प्रशंसा पनि गरेका छन्।

इरान र युएईबीच बढ्दो तनाव अमेरिका र इजरायलसँग जारी युद्धका बीच इरान र युएईबीच पनि तनाव बढेको छ। युद्धको क्रममा इरानले युएईमाथि पटकपटक आक्रमण गरेको युएईको दाबी छ। अर्कोतर्फ, इरानका विदेशमन्त्री अब्बास अराघचीले युएईलाई अमेरिका र इजरायलको सक्रिय साझेदार भएको आरोप लगाउँदै इरानमाथि भइरहेको आक्रमणहरूमा युएईको प्रत्यक्ष संलग्नता रहेको बताएका छन्। यसको जवाफमा युएईले भनेको छ कि इरानले आफ्ना आक्रमणहरूलाई औचित्य प्रदान गर्न मात्र यस्ता आरोप लगाइरहेको हो।