मध्य अमेरिकामा शक्तिशाली आँधी र भारी असिना–पानीको चेतावनी जारी गरिएको छ र लाखौं मानिसहरूलाई सतर्क रहन भनिएको छ। नेब्रास्का स्थित ग्रान्ड आइल्यान्ड नजिक टोर्नाडो पुष्टि भई ‘टोर्नाडो इमर्जेन्सी’ जारी गरिएको छ। दक्षिणी हाई प्लेन्स क्षेत्रमा डढेलोको जोखिम उच्च रहेको र हावाको गति प्रतिघण्टा २५ देखि ३० माइलसम्म रहने अनुमान गरिएको छ। ४ जेठ, काठमाडौं।
प्लेन्स र मिडवेस्ट क्षेत्रमा शक्तिशाली चट्याङसहित आँधी शुरू भइसकेको छ र यो मंगलबारसम्म जारी रहने अमेरिकी मौसमविद्हरूले बताएका छन्। यस अवधिमा शक्तिशाली टोर्नाडो (ईएफ–३ वा सोभन्दा माथि), विनाशकारी असिना, तीव्र हावा र भारी वर्षाको जोखिम रहने मौसमविद्हरूले बताएका छन्। पछिल्लो मौसम प्रणालीले एरिजोनादेखि दक्षिणपश्चिम कान्साससम्म क्षेत्रहरूमा उच्च डढेलो जोखिम पनि बढाएको छ।
अमेरिकी राष्ट्रिय मौसम सेवाले नेब्रास्काको ग्रान्ड आइल्यान्डको उत्तर क्षेत्रमा टोर्नाडो पुष्टि भएको जनाएको छ। नेब्रास्काको हेब्रोन नजिक आइतबार साँझ करिब ६:३० बजे ‘टोर्नाडो इमर्जेन्सी’ जारी गरिएको थियो। यो सबैभन्दा गम्भीर प्रकारको टोर्नाडो चेतावनी हो। मौसमविद्हरूले ठूलो र विनाशकारी टोर्नाडो आउँदैछ भन्ने पूर्ण निश्चित भएपछि मात्र यस्तो चेतावनी जारी गर्दछन्।
आइतबार मात्र अमेरिकाको मध्य क्षेत्रमा करिब ३० लाख मानिसहरूलाई लक्षित गर्दै चारवटा टोर्नाडो वाच जारी गरिएको थियो। नेब्रास्का, कान्सास, आयोवा, मिनेसोटा र साउथ डकोटाका धेरै क्षेत्र उच्च जोखिममा परेका छन्। केही स्थानमा हावाको गति प्रतिघण्टा ८० माइलभन्दा माथि पुग्ने अनुमान गरिएको छ। जेट स्ट्रिमको सबैभन्दा शक्तिशाली ऊर्जा प्लेन्स क्षेत्रमा रहेको अत्यधिक आद्रतासँग मिल्दा सोमबार व्यापक र भीषण आँधीको सम्भावना रहेको मौसम सेवा केन्द्रले जनाएको छ।
