अमेरिकी राष्ट्रपति डोनल्ड ट्रम्पले इरानसँग शान्ति सम्झौता हुनसक्ने आशा व्यक्त गरेका छन्। उनले केही समयअघि “इरानमाथि आफूले गर्न लागेको आक्रमणलाई अहिलेलाई स्थगित गरेको” घोषणा गरेका छन्। कतार, साउदी अरेबिया र संयुक्त अरब इमिरेट्सको आग्रहमा उक्त निर्णयमा पुगेको ट्रम्पले ट्रुथ सोसलमा एउटा पोस्ट गर्दै जानकारी दिएका छन्। उनका अनुसार “अहिले गम्भीर वार्तालाप सुरु हुन लागेको बेला” मङ्गलवार गर्ने भनिएको सैन्य आक्रमण तत्कालका लागि रोकेको हो।
शान्ति सम्झौताको सम्भावना औँल्याउँदै ट्रम्पले तेहरानलाई परमाणु हतियार विकासका सबै प्रयासहरू छोड्न तयार हुनुपर्ने बताएका छन्। ट्रम्पकै अनुसार अमेरिकाका लागि “धेरै स्वीकार्य” सम्झौता हुने सम्भावना रहेको छ। तर हप्तौंसम्मको अप्रत्यक्ष वार्तामा खासै प्रगति देखिएको छैन। पत्रकारहरूसँग कुरा गर्दै ट्रम्पले यसलाई “धेरै सकारात्मक विकास” भनेका छन्, “तर के हुन्छ वा हुँदैन हामी हेर्नेछौँ।”
ट्रम्पले भनेका छन्, “हामी यस्तो अवस्थामा थियौँ कि सहमतिमा नजिक छौं जस्तो देखिन्थ्यो, तर त्यो काम लागेन। तर अहिले केही फरक छ।” उनको बुझाइमा इरानसँग सम्झौता हुने “निकै राम्रो सम्भावना” छ। “यदि हामीले इरानमाथि बमबारी नगरी सहमति गर्न सक्यौँ भने म धेरै खुसी हुने छु,” उनले बताएका छन्। तर राष्ट्रपति ट्रम्पले यदि कुनै स्वीकार्य सम्झौता नभए अमेरिकाले “क्षणभरको सूचनामा इरानमाथि पूर्ण र ठूलो स्तरको आक्रमण गर्न तयार रहेको” चेतावनी दिएका छन्।
इरानका एक वरिष्ठ सैन्य कमाण्डरले अमेरिकालाई “फेरि रणनीतिक भूल र गलत अनुमान” नगर्न आग्रह गरेका छन्। इरानको तस्निम समाचार संस्थाले सोमवार राती सर्वोच्च नेता मोज्तबा खामेनेईको प्रतिक्रिया प्रकाशित गरेको छ, जसमा “शत्रुलाई न्यून अनुभवसहित कमजोर साबित हुने” नयाँ मोर्चा खोल्ने चेतावनी दिइएको छ। सोमबार इरानले अमेरिकाको पछिल्लो प्रस्तावको जवाफ दिएको र पाकिस्तानी मध्यस्थकर्ताहरू मार्फत वाशिङ्टनसँग वार्ता जारी रहेको बताएको थियो।
