इरानसँगको युद्ध रोक्न अमेरिकी संसद्ले प्रस्ताव पारित गर्यो, ट्रम्पसँग अझै भिटो अधिकार बाँकी
अमेरिकी संसद्ले राष्ट्रपति ट्रम्पको सैन्य अधिकार सीमित गर्ने प्रस्ताव ५०-४७ मतले पारित गरेको छ। यो प्रस्ताव कानुन बनेमा ट्रम्प प्रशासनले इरानविरुद्धको युद्ध जारी राख्न कङ्ग्रेसबाट अनुमति लिनुपर्नेछ। अमेरिकी कानुन अनुसार राष्ट्रपतिले संसद्को अनुमति बिना ६० दिन मात्र सैन्य कारबाही गर्न सक्छन्। ७ जेठ, काठमाडौं।
मतदानमा चार रिपब्लिकन सांसदहरूले विपक्षी डेमोक्र्याट पार्टीसँग सहमति जनाएका थिए भने तीन रिपब्लिकन सांसदहरू मतदानमा अनुपस्थित थिए। यो प्रस्ताव ५०-४७ मतले पारित भएको हो। तर यो प्रस्तावले कानुन बन्नका लागि अझै केही चरण पूरा गर्नुपर्नेछ। यदि यो प्रस्ताव कानुन बन्छ भने ट्रम्प प्रशासनले इरानविरुद्धको युद्ध जारी राख्न कङ्ग्रेसबाट अनुमति लिनुपर्ने हुन्छ। हाल सिनेटमा यस विषयमा अन्तिम मतदान हुन बाँकी छ।
रिपब्लिकन बहुमत रहेको हाउस अफ रिप्रेजेन्टेटिभ्सबाट पनि यसले अनुमोदन प्राप्त गर्नुपर्नेछ। यद्यपि त्यसपछि पनि ट्रम्पले यो प्रस्ताव विरुद्ध ‘भिटो’ गर्न सक्छन्। भिटोलाई रद्द गर्न सिनेट र हाउस दुबैमा दुई तिहाइ बहुमत आवश्यक हुन्छ, जुन अहिलेको अवस्थामा सजिलो छैन। अमेरिकी संसद्को सिनेटमा मंगलवार साँझ इरानसँगको युद्ध रोक्ने विषयमा बैठक भएको थियो।
विपक्षी पक्षले यस मतदानलाई ठूलो सफलता मानिरहेका छन्। उनीहरूले भनेका छन् कि अमेरिकी संविधान अनुसार युद्ध सुरु गर्ने वा सेना पठाउने अधिकार राष्ट्रपतिमा नभई संसदीय निकायमा हुनु पर्छ। यो प्रस्ताव भर्जिनिया राज्यका डेमोक्र्याट सिनेटर टिम केनले प्रस्तुत गरेका हुन्। बहसमा भाग लिँदै उनले भनें, ‘अहिले जब युद्धविरामको कुरा भइरहेको छ, ट्रम्पले संसद्को अगाडि आएर आफ्नो रणनीति स्पष्ट रूपमा प्रस्तुत गर्नुपर्छ।’ अर्कोतर्फ, ह्वाइट हाउसले भनेको छ कि ट्रम्पले अमेरिकी सुरक्षाका लागि आफ्नो अधिकार प्रयोग गर्दै कारबाही गरेका हुन्।
