जापानमा ओभरस्टे गरेका कामदारहरूको खोजीमा सामाजिक सञ्जालको प्रयोग गर्ने तयारी

जापानको अध्यागमन एजेन्सीले अवैध विदेशी कामदार र ओभरस्टेहरूमाथि अनुसन्धान गर्न सामाजिक सञ्जाल अनुगमन गर्ने योजना बनाएको छ। सन् २०२७ सम्ममा अवैध कामसम्बन्धी अनलाइन विज्ञापन पहिचान गर्न विश्लेषणात्मक उपकरण र साइबर गस्ती टोली स्थापना गरिनेछ। इबाराकी प्रान्तले अवैध कामदार राख्ने व्यवसायबारे सूचना दिने व्यक्तिलाई १० हजार येन पुरस्कार दिने घोषणा गरेको छ।

जापानको अध्यागमन अधिकारीहरूले देशमा भिसाको अवधि सकिए पनि बसिरहेका (ओभरस्टे) र अवैध विदेशी कामदारहरूको बारेमा जानकारी पाउन सामाजिक सञ्जाल र अन्य प्लेटफर्महरूको मनिटरिङ गरी कडा कदम चाल्ने योजना बनाए छन्। श्रम अभावका कारण जापानले विदेशी कामदारको संख्या बढाइरहेको अवस्थामा ओभरस्टे गर्ने मानिसहरूको संख्या घटाउने प्रयासको रूपमा यो योजना अघि सारिएको हो।

अध्यागमन सेवा एजेन्सीले सन् २०२७ सम्ममा विदेशी भाषामा गरिएका माग वा विज्ञापनहरू सहित अवैध कामसम्बन्धी अनलाइन जानकारी पत्ता लगाउन विश्लेषकीय उपकरणहरू प्रयोग गर्ने र साइबर गस्तीका लागि छुट्टै इकाई स्थापना गर्ने योजना बनाएको छ। एजेन्सीका तथ्याङ्कअनुसार, गत जनवरीसम्म जापानमा करिब ६८ हजार अवैध बसोबास थिए, जुन अघिल्लो वर्षको तुलनामा करिब ६ हजारले घटेको हो।

ओभरस्टे भएकाहरूमाथि निशाना बनाउँदै एजेन्सीले वैध भिसा नभएका विदेशी कामदारलाई रोजगार दिने पक्षमाथि पनि कडा कारबाही गर्ने लक्ष्य राखेको छ। टोकियोको उत्तर-पूर्वमा रहेको इबाराकी प्रान्तीय सरकारले हालै अभिलेख नभएका (अवैध) विदेशी कामदार राख्ने व्यवसायबारे सूचना दिने व्यक्तिहरूलाई पुरस्कृत गर्ने कार्यक्रम सुरु गरेको छ। यदि यस्तो सूचनाले कानुनी कारबाही सम्भव भएमा सूचनाकर्ताले १० हजार येन (८० सिंगापुर डलर) पुरस्कार पाउनेछन्।