काठमाडौं । खैरो (ब्लोन्ड) रौँ भएको एक राँगो, जसले ‘डोनाल्ड ट्रम्प’ उपनाम पाएको थियो, बंगलादेश सरकारको अन्तिम समयमा हस्तक्षेप पश्चात् बकरइदको बलि दिनबाट बचेको छ। करिब ७०० केजी तौल भएको यो दुर्लभ ‘अल्बिनो’ राँगो बलिको धार्मिक अनुष्ठानका लागि एक ग्राहकलाई बिक्री गरिएको थियो। तर बंगलादेश सरकारले उक्त राँगो चिडियाखानामा पठाउने निर्णय गरेको छ।
बिहीबार मनाइने बकरइद पर्वको पूर्वसन्ध्यामा राँगो हेर्न सामान्य मानिसहरूको अत्यधिक भीड भेला भएपछि, र सुरक्षा संवेदनशीलतालाई ध्यानमा राख्दै बंगलादेश गृह मन्त्रालयले बुधबार हस्तक्षेप गरेको हो। मन्त्रालयका अधिकारीका अनुसार, राँगोप्रति जनताको असाधारण चासो र भीडका कारण सुरक्षाको दृष्टिले अन्तिम समयमा यसलाई बलि नदिन निर्णय गरिएको छ। गृह मन्त्री सलाहुद्दिन अहमदको निर्देशनमा ग्राहकलाई रकम फिर्ता गराइएको छ र राँगोलाई ढाकास्थित राष्ट्रिय चिडियाखानामा स्थानान्तरण गरिएको छ।
यस राँगोको खैरो कपाल र शान्त स्वभावका भिडियोहरू सामाजिक सञ्जालमा व्यापक रूपमा भाइरल भएका छन्, जसका कारण टाढा-टाढाबाट मानिसहरू फार्ममा पुगेर हेर्न आउने गरेका थिए। फार्मका सञ्चालक जियाउद्दिन मृधाका अनुसार उनका भाइले यसको स्वरूप अमेरिकी राष्ट्रपति डोनाल्ड ट्रम्पसँग मिल्ने देखेर यसलाई ‘डोनाल्ड ट्रम्प’ नामाकरण गरेका थिए।
