१४ जेठ, काठमाडौं । नेपाली महिला क्रिकेट टोली एसियन गेम्सको महिला क्रिकेट छनोट प्रतियोगितामा सेमिफाइनल सम्म पुगेको छ। बिहीबार भएको खेलमा इन्डोनेसियालाई ४ विकेटले हराउँदै नेपालले सेमिफाइनल प्रवेश गरेको हो। इन्डोनेसियाले दिएको ११४ रनको लक्ष्य नेपालले ३ बल बाँकी छँदा ६ विकेट गुमाएर पूरा गर्यो। कप्तान इन्दु बर्माले ४३ बलमा अविजित ४२ रन बनाएकी थिइन्। सोनी पाख्रिनले २९, कविता कुँवरले १४ र सीता राना मगरले अविजित १३ रन बनाए।
इन्डोनेसियाका लागि ना मादे पुत्री सुवानदेवी र नि कदेक अरियानीले २-२ विकेट लिए भने इदादा लक्समी पारामिथा र साङ आयु नोम्यानले १-१ विकेट लिए। मलेसियाको वायुमास ओभलमा टस जितेर पहिले ब्याटिङ गरेको इन्डोनेसियाले २० ओभरमा ४ विकेट घटेर ११३ रन बनाएको थियो। इन्डोनेसियाका कप्तान नि पुतु आयु नन्दा सकारिनीले अविजित ५२ रन बनाइन। त्यस्तै, नि लु केतुत वेसिका रतना देवीले २३ रन बनाएका थिए।
नेपालका लागि मनिषा उपाध्यायले २ तथा रिया शर्माले १ विकेट लिए। नेपालले यसअघि बुधबार चीनलाई पराजित गरिरहेको थियो। अब नेपालले सेमिफाइनलमा मलेसियासँग खेल्नेछ। उक्त खेल जितेको खण्डमा नेपाल एसियन गेम्समा छनोट हुनेछ। सेमिफाइनलमा पराजित भए पनि तेस्रो स्थानको खेलमा विजयी भएमा नेपाल छनोट प्राप्त गर्नेछ।
सम्बन्धित खबर
