काठमाडौं जिल्ला क्रिकेट संघको आयोजनामा तेस्रो संस्करणको यू–१६ विद्यालयस्तरीय क्रिकेट प्रतियोगिता आगामी १९ जेठदेखि सुरु हुँदैछ। त्रिवि र मूलपानी क्रिकेट मैदानमा आयोजना हुने प्रतियोगितामा २४ विद्यालय सहभागी हुनेछन्। विजेताले १ लाख ५० हजार र उपविजेताले ७५ हजार रुपैयाँ पुरस्कार पाउनेछन्।
प्रतियोगिताको मिति सार्वजनिक गर्दै शनिबार होटल स्मार्ट, धुम्बाराहीमा ट्रफी अनावरण र मुख्य प्रायोजकसँग सम्झौता गरिएको छ। प्रतियोगिता जेठ १९ देखि २५ गतेसम्म तल्लो मूलपानी, माथिल्लो मूलपानी र त्रिवि क्रिकेट मैदानमा सञ्चालन हुनेछ। सहभागी टोलीहरू ८ समूहमा विभाजित छन् र प्रत्येक समूहको शीर्ष टोली क्वाटरफाइनलमा प्रवेश गर्नेछ। सबै खेल टी–२० फारम्याटमा हुने जानकारी टे«क्निकल डाइरेक्टर रवीन्द्र गुप्ताले दिएका छन्।
प्रतियोगिताको मुख्य प्रायोजक एसियन ई–लर्निङ सेन्टर रहेको छ। सह–प्रायोजकहरूमा ई–सेवा, लाइफ इन्स्योरेन्स कर्पोरेसन (नेपाल) लिमिटेड र प्रभु बैंक लिमिटेड रहेका छन्। कार्यक्रमका क्रममा एसियन ई–लर्निङ सेन्टरका निर्देशक मीना त्रिपाठी लिम्बु र काठमाडौं जिल्ला क्रिकेट संघका अध्यक्ष दिवाकर घलेबीच सम्झौतापत्रमा हस्ताक्षर भएको थियो।
प्रतियोगितामा समूह ‘ए’ मा डीएभी सुशील केडिया विश्व भारती स्कूल, नेक्सस इन्टरनेशनल एकेडेमी र रेडियन्ट रिडर्स स्कूल छन्। समूह ‘बी’ मा सैनिक आवासीय महाविद्यालय, त्रियोग उच्च माध्यमिक विद्यालय र क्रियटिभ एकेडेमी छन्। अन्य समूहहरूमा ग्यालेक्सी पब्लिक स्कूल, हिमालयन ह्वाइट हाउस आईबी वर्ल्ड स्कूल, एन्जल्स हार्ट नेसनल स्कूल, ज्ञान मन्दिर सेकेन्डरी इङ्ग्लिश स्कूल, र अन्य विद्यालयहरू रहेका छन्।
