१६ जेठ, काठमाडौं । नेपाली कांग्रेसका महामन्त्री प्रदीप पौडेलले नेपाललाई पुनः एकात्मक व्यवस्थातर्फ फर्काउने भन्ने चर्चा भइरहेकामा गम्भीर चिन्ता व्यक्त गरेका छन् । शनिबार कांग्रेसको भ्रातृ संस्था नेपाल थारु संघको पहिलो महाधिवेशन उद्घाटन समारोहमा मन्तव्य दिँदै उनले संघीयता खारेज गर्ने शैलीका चर्चा सुनिने बताएका छन् ।
‘संविधानमा प्राप्त भएका उपलब्धिहरू सुरक्षित राख्दै अगाडि बढाउनु आवश्यक छ । मुलुक पुनः एकात्मक राज्य प्रणालीतर्फ फर्कने चर्चा चलिरहेको छ,’ महामन्त्री पौडेलले बताए, ‘संसदीय व्यवस्थालाई कमजोर पार्ने प्रयास भइरहेछन् भन्ने देखिन्छ।’ त्यसैले संविधानले दिएका उपलब्धिहरूको रक्षा गर्दै त्यसको कार्यान्वयनमा सबै पक्षले मिलेर काम गर्नुपर्नेमा उनले जोड दिए।
यदि यी उपलब्धि खोसिए राष्ट्रिय पुनः एकात्मक व्यवस्थातर्फ जान सक्ने चेतावनी उनले दिएका छन्। ‘थारु समुदाय उपेक्षित भएको सत्य हो, तर अहिले संविधानले धेरै अधिकार र अवसर प्रदान गरेको छ । त्यो पूर्ण नभए पनि त्यसको रक्षा हाम्रो जिम्मेवारी हो,’ महामन्त्री पौडेलले भने ।
थारु समुदायले सिमानामा बसेर नेपालको सुरक्षा गरेका साथै राष्ट्रिय आर्थिक विकासमा महत्वपूर्ण योगदान पुर्याएको उनले स्मरण गराए।
सम्बन्धित खबर
