नेपालले एसियन गेम्स छनोटमा चीनलाई २२१ रनले विशाल पराजय

नेपाली पुरुष क्रिकेट टोलीले एसियन गेम्स छनोट खेलमा चीनलाई २२१ रनको फराकिलो अन्तरले पराजित गरेको छ। टस हारेर पहिले ब्याटिङ गरेको नेपालले तोकिएको २० ओभरमा २ विकेट गुमाएर ३१३ रनको विशाल स्कोर बनाएको थियो। कुशल भुर्तेलले एउटै ओभरमा ६ छक्का प्रहार गर्दै विश्वकै छैटौं खेलाडीको कीर्तिमान कायम गरेका छन्। १७ जेठ, काठमाडौं। कुशल भुर्तेलको शानदार शतकपछि बलिङमा उत्कृष्ट प्रदर्शन गर्दै नेपाली पुरुष क्रिकेट टोलीले एसियन गेम्स छनोटमा चीनमाथि फराकिलो जित हात पारेको छ। नेपालले दिएको ३१४ रनको लक्ष्य पछ्याएको चीन १९.२ ओभरमा ९२ रनमा अलआउट भयो। नेपालले २२१ रनले फराकिलो जित निकाल्न सफल भयो। चीनका लागि झेङ सेनिजानले सर्वाधिक ३१ रन बनाए। जिआनहो दुले १७ रन तथा तियान सेनकुनले १२ रन बनाए। अन्य खेलाडीहरूले दोहोरो अंकको रन बनाउन सकेनन्। नेपालका लागि कुशल मल्लले ३ विकेट लिए। सन्दीप लामिछाने र सोमपाल कामीले २-२ विकेट लिए भने नन्दन यादवले १ विकेट लिए। नेपालले २० ओभरमा २ विकेट गुमाएर ३१३ रन बनाएको थियो, जुन नेपालको दोस्रो उच्चतम स्कोर हो। यसअघि नेपालले एसियन गेम्समा मंगोलियाविरुद्ध ३१४ रनको योगफल बनाएको थियो। कुशल भुर्तेलले आक्रामक ब्याटिङ गर्दै ४३ बलमा १२९ रन बनाए। उनले ५ चौका र १६ छक्का प्रहार गरे। कुशल मल्ल ४७ बलमा ८५ रन बनाउँदै रोहित पौडेल २१ बलमा ६९ रनमा अविजित रहे। भुर्तेलले खेलको नवौं ओभरमा ६ छक्का प्रहार गरेका थिए। उनी यो कीर्तिमान बनाउन सफल नेपालको दोस्रो खेलाडी हुन् र विश्वकै छैटौं खेलाडी समेत हुन्। चीनका लागि मा कुइनचेन र डेंग जिंकीले १-१ विकेट लिए।