इन्डोनेसियाको पूर्वी पपुवा क्षेत्रमा आइतबार भएको शक्तिशाली विस्फोटमा पाँच व्यक्तिको मृत्यु भएको छ भने २० जना घाइते भएका छन्। पपुवा प्रहरीका प्रवक्ता काह्यो सुकार्निटोले “विस्फोटको स्रोत दोस्रो विश्वयुद्धबाट बाँकी रहेको बम वा मोर्टार हुनसक्ने आशङ्का गरिएको छ” भने। विस्फोटले ९ वटा घर ध्वस्त भएका छन् र ३ जना अझै बेपत्ता छन्।
स्थानीय समयअनुसार आइतबार दिउँसो भएको विस्फोटले गाउँभरि ठूलो त्रास फैलाएको थियो। कोम्पास टिभीले देखाएको दृश्यमा विस्फोटसँगै ठूलो गर्जन कुटिएको, अग्निको ठूलो मुस्लो उठेको र त्यसपछि बाक्लो धुवाँ आकाशतर्फ फैलिएको स्पष्ट देखिएको छ। विस्फोट यति शक्तिशाली थियो कि घटनास्थल वरिपरिका नौवटा घर पूर्ण रूपमा भत्किएका छन्। प्रहरीका अनुसार विस्फोट एउटा स्टिल्ट हाउस अर्थात खम्बामाथि बनाइएको घरमुनि भएको थियो।
प्रारम्भिक अनुसन्धानका आधारमा यसको स्रोत दोस्रो विश्वयुद्धताका प्रयोग भएको बम वा मोर्टार हुन सक्ने अनुमान गरिएको छ। काह्यो सुकार्निटोले एएफपीसँग कुरा गर्दै भने, “विस्फोटको स्रोत दोश्रो विश्वयुद्धबाट बाँकी रहेको बम वा मोर्टार हुनसक्ने आशंका गरिएको छ।” घटनापछि खोज र उद्धारकार्य जारी रहँदा अवस्था अझै पूर्ण रूपमा स्पष्ट भइसकेको छैन। तीन जना अझै बेपत्ता रहेका छन्।
काह्योका अनुसार घटनास्थलबाट फेला परेका केही मानव अंगहरूको पहिचान प्रक्रिया पनि अझै पूरा हुन सकेको छैन। उहाँले कम्तीमा १९ जनाले सामान्य चोटपटक पाएको र तिनीहरूको उपचार भइरहेको जानकारी दिनुभयो। इन्डोनेसियामा विस्फोटसँग सम्बन्धित यस्ता घटनाहरू पहिला पनि भएका छन्। गत वर्ष पश्चिम जाभा प्रान्तमा इन्डोनेसियाली सेनाले प्रयोगविहीन हतियारहरू नष्ट गर्ने क्रममा खाडलभित्र विस्फोट गराउँदा १३ जनाको मृत्यु भएको थियो।
