२६ जेठ, काठमाडौं । राष्ट्रिय प्रजातन्त्र पार्टी (राप्रपा) ले दरबार हत्याकाण्डको छानबिनका लागि गृहमन्त्री सुधन गुरुङले लिएको निर्णयलाई पूर्ण रूपमा स्वागत गरेको छ। राप्रपाका संसदीय दलका नेता ज्ञानेन्द्र शाहीले गृहमन्त्री सुधन गुरुङलाई बधाइ दिँदै सफल कार्यकालको शुभकामना व्यक्त गर्दै दरबार हत्याकाण्डको छानबिन गर्ने निर्णयलाई उच्च प्रशंसा गरेका छन्।
‘दरबार हत्याकाण्डको निष्पक्ष र गहिरो छानबिन गर्ने प्रतिबद्धताको हार्दिक स्वागत गर्दछु,’ शाहीले सामाजिक सञ्जालमा लेखेका छन्, ‘सत्य तथ्य उजागर गर्न घटनाकालमा जिम्मेवारीमा रहेका सबै सरोकारवालाहरू, विशेष गरी तत्कालीन गृहमन्त्री र वर्तमान राष्ट्रपति महामहिम रामचन्द्र पौडेललाई अनुसन्धानको दायरामा ल्याएर निष्पक्ष छानबिन गर्न हार्दिक अपिल गर्दछु।’
