नेपालका परराष्ट्रमन्त्री शिशिर खनालको बेइजिङ भ्रमणका क्रममा दुवै पक्षले विगतमा सहमति भएका कार्यक्रम र परियोजनाको द्रुत कार्यान्वयनप्रति दृढ प्रतिबद्धता व्यक्त गरेको परराष्ट्र मन्त्रालयले आफ्नो विज्ञप्तिमा जनाएको छ, तर यसमा ‘बीआरआई’को उल्लेख छैन। बेइजिङस्थित कार्यवाहक नेपाली राजदूत रोशन खनालले बेल्ट एन्ड रोड अवधारणा (बीआरआई)मा नेपालको संलग्नताबारे पूर्ववर्ती सरकारले गरेका निर्णयमा नेपालको धारणा नफेरिएको बताइन्।
“तर खास खास परियोजनाका बारेमा छुट्टाछुट्टै छलफल हुन त बाँकी नै छ। विस्तारै त्यसका प्राविधिक पक्ष, आर्थिक ढाँचाबारे पछि छुट्टाछुटै छलफल हुन्छ,” खनालले भनिन्। उनले यस भ्रमणमा चीनसँग डिजिटल पूर्वाधार विकास र प्रविधि हस्तान्तरणमा समेत सहयोगको अपेक्षा गरिएको बताउँदै, “सत्ता नेतृत्व गर्ने गरी आएको नयाँ दल रास्वपाको चीनप्रतिको धारणामा कुनै परिवर्तन नआएको” आश्वस्त पार्नु रहेको बताइन्।
चिनियाँ विदेश मन्त्रालयको विज्ञप्तिमा भने बेइजिङ नेपालसँग मिलेर उच्च गुणस्तरको बेल्ट एण्ड रोड बीआरआई अवधारणा निर्माण गर्न इच्छुक रहेको जनाइएको छ। नेपालले सन् २०१७ मा नै चीनसँग बीआरआईसम्बन्धी समझदारी पत्रमा हस्ताक्षर गरे पनि हालसम्म उक्त अवधारणा अन्तर्गतका परियोजना कार्यान्वयनका लागि महत्त्वपूर्ण निर्णय लिन सकेको छैन।
नेपाल मामिलाका विज्ञ गाओ ल्याङले भने, “नेपालले अत्यन्तै संवेदनशील भूराजनीतिक वातावरणमा काम गर्ने” बताउँदै काठमाण्डूले “बीआरआईको सन्दर्भलाई जानाजान बेवास्ता गरेको” हुनसक्ने टिप्पणी गरे। उनले द्विपक्षीय छलफलमा पहिले हस्ताक्षर गरिएका सहयोग सम्झौताहरूको कार्यान्वयनको विषय पनि समेटिनु महत्त्वपूर्ण रहेको बताए।
सम्बन्धित खबर
