१० असार, काठमाडौं । अमेरिकी राष्ट्रपति डोनाल्ड ट्रम्पले इरानका परमाणु स्थलहरूको निरीक्षण गर्न नदिए वार्ता रद्ध गरिने चेतावनी दिएका छन्। उनले भनेका छन् कि इरानले यसअघि नै अन्तर्राष्ट्रिय निरीक्षणको शर्त स्वीकारिसकेको छ र त्यसैले इरानका परमाणु स्थलहरूमा निरीक्षण गरिनुपर्छ। पेन्सिलभेनियामा पत्रकारहरूसँग कुरा गर्दै ट्रम्पले भने, ‘यदि उनीहरूले यी विषयहरूबाट पछि हटे भने म तुरुन्तै वार्ता रद्द गर्ने छु।’
हालै स्वीटजरल्याण्डमा भएको अमेरिका र इरानबीचको वार्तामा अमेरिकी पक्षले इरानी तेल बिक्रीमा लगाइएको प्रतिबन्ध अस्थायी रूपमा ६० दिनका लागि हटाउने र १२ अर्ब डलर बराबरको कोष फुकुवा गर्ने सहमति गरेका थिए। साथै, इरानले अन्तर्राष्ट्रिय आणविक ऊर्जा एजेन्सी (आईएईए) का निरीक्षकहरूलाई पुनः आफ्नो मुलुकमा प्रवेश गर्न दिने सहमति जनाएको छ। यसैबीच दीर्घकालीन युद्धविराम स्थापना गर्न थप वार्ताहरू गर्ने सहमति पनि भएको थियो।
ट्रम्पका अनुसार संयुक्त राष्ट्रसंघीय परमाणु निकाय आईएईएको टोली सही समयमा इरान पुगेर त्यहाँको परमाणु कार्यक्रमको निगरानी गर्नेछ। तर, उनले निरीक्षण कहिले सुरु हुन्छ भन्ने स्पष्ट जानकारी भने सार्वजनिक गरेका छैनन्।
