ब्राजिलियन विंगर भिनिसियस जुनियरले स्पेनिस क्लब रियल मड्रिडसँग थप छ वर्षका लागि नयाँ सम्झौता गरेका छन्। क्लबले जारी गरेको विज्ञप्ति अनुसार उनी अब ३० जुन २०३२ सम्म रियल मड्रिडमा निर्बाध रूपमा रहनेछन्। सन् २०१८ मा रियल मड्रिडमा आबद्ध भएका भिनिसियसले हालसम्म क्लबका लागि ३७५ खेल खेलेका छन् र १२८ गोल गरेका छन्।
रियल मड्रिडले विज्ञप्ति जारी गर्दै भिनिसियससँगको सम्झौता ६ वर्ष थप गरिएको जनाएको छ। ‘रियल मड्रिड र भिनिसियस जुनियरले आपसी सहमतिमा सम्झौता विस्तार गरेका छन्, जसले उनलाई ३० जुन २०३२ सम्म क्लबमा कायम राख्नेछ। भिनिसियस जुनियर हाम्रो इतिहासकै सबैभन्दा सफल अवधिहरूमध्ये एकमा सबैभन्दा महत्वपूर्ण खेलाडीहरू मध्येकामध्ये एक बन्न सफल भएका छन्,’ विज्ञप्तिमा उल्लेख गरिएको छ।
पछिल्लो १८ महिनादेखि क्लब र भिनिसियसका प्रतिनिधिहरूबीच नयाँ सम्झौताबारे छलफल हुँदै आएको थियो। अब उनले आफूलाई सदैवको सपनाको क्लब भनेका रियल मड्रिडमै आफ्नो करियरलाई थप लम्ब्याइरहेका छन्। ब्राजिलबाट विश्वकप खेलेर फर्केका उनी सोमबार प्रि–सिजन प्रशिक्षण र स्वास्थ्य परीक्षणका लागि क्लबमा फर्किएका थिए। भिनिसियसले जुलाई २०१८ मा १८ वर्षको उमेरमा रियल मड्रिडमा आबद्ध भएर ८ सिजनमा कुल ३७५ खेल खेलेका छन्, जसमा उनले १२८ गोल गरे र १४ वटा ट्रफी जितेका छन्। ब्राजिल राष्ट्रिय टोलीका लागि भिनिसियसले ५४ अन्तर्राष्ट्रिय खेलमा १३ गोल गरेका छन्।
