काठमाडौंका दुई फरक स्थानबाट स्रोत नखुलेको २४ लाख २ हजार रुपैयाँ नगदसहित दुई जनालाई प्रहरीले पक्राउ गरेको छ। स्याङ्जाका ईश्वर थापा र काठमाडौंका सुदर्शन खड्कालाई शंकास्पद अवस्थामा नियन्त्रणमा लिइएको छ। पक्राउ परेकाहरूसँगै नगद रकम, मोटरसाइकल र स्कुटर बरामद गरी अनुसन्धान सुरु गरिएको छ।
पक्राउ पर्नेमा स्याङ्जा वालिङ नगरपालिका-६ घर भएका ४१ वर्षीय ईश्वर थापा र काठमाडौं कपन बस्ने ४२ वर्षीय सुदर्शन खड्का छन्। थापाको साथबाट १९ लाख ९४ हजार रुपैयाँ र खड्काको साथबाट ४ लाख ८ हजार रुपैयाँ गरी जम्मा २४ लाख २ हजार रुपैयाँ बरामद गरिएको छ, प्रहरीले जनाएको छ।
प्रहरी वृत्त दरबामार्गबाट खटिएको टोलीले आइतबार राति केशरमहलतर्फ जाँदै गरेको बा.प्र ०२-०४२ प ५२०७ नम्बरको स्कुटर जाँच गर्ने क्रममा थापाको साथबाट उक्त रकम बरामद गरेको हो। त्यस्तै, प्रहरी वृत्त मालीगाउँबाट खटिएको प्रहरीले आइतबार राति काठमाडौं महानगरपालिका-२८ कमलादी गणेश मन्दिर नजिकबाट खड्काको साथबाट पनि उक्त रकम बरामद गरेको छ। सोसँगै, प्रहरीले उनले प्रयोग गरेको बागमती एएए ७७२० नम्बरको मोटरसाइकल पनि बरामद गरेको छ। यस सम्बन्धमा प्रहरीले आवश्यक अनुसन्धान गरिरहेको छ।
