यूके र युरोपमा झन्डै ३० वर्षपछि सबैभन्दा दुर्लभ सूर्यग्रहण देखिएको छ। यो खगोलीय परिघटना लाखौँ मानिसले अवलोकन गरेका छन्। यूकेबाट खण्डग्रास अर्थात् आंशिक सूर्यग्रहण मात्र देखियो भने ग्रीनल्यान्ड, आइसल्यान्ड र स्पेनका केही भागमा खग्रास अर्थात् पूर्ण सूर्यग्रहणका कारण चारैतिर अँध्यारो छायो। यूके र युरोपका विभिन्न अवलोकनस्थलमा ठूलो सङ्ख्यामा भेला भएका मानिसहरूले उक्त परिघटनाले ब्रह्माण्ड कति “अद्भुत” छ भन्ने कुराको स्मरण गराएको बताएका छन्।
खग्रास सूर्यग्रहण रुसस्थित साइबेरियाको उत्तरी भागबाट देखिन शुरू भएको थियो। त्यसपछि यो दृष्य क्रमशः आर्क्टिक सागर हुँदै साँझपख आइसल्यान्डबाट देखियो। त्यसपछि दक्षिणतर्फ अघि बढ्दै जाँदा यूकेबाट पनि उक्त अद्भुत दृश्यको केही अंश देखियो। खण्डग्रास सूर्यग्रहण उत्तरी स्कटल्यान्डमा स्थानीय समयअनुसार लगभग १८:०० बजे र इङ्ल्यान्डको दक्षिणी तटमा १८:२० को केही अघि सुरु भयो।
सुरुमा उक्त दृश्य खासै छुट्ट्याउन सकिने अवस्थामा थिएन। तर खुला आकाशमुनि भेला भएका मानिसहरूले चन्द्रमाले बिस्तारै सूर्यलाई ढाकिरहेको देखे। मध्य र दक्षिणी इङ्ल्यान्ड तथा वेल्सका अधिकांश क्षेत्रमा आकाश पूर्ण रूपमा सफा थियो। त्यसैले करिब एक घण्टाको अवधिमा चन्द्रमा बिस्तारै सूर्यको अगाडि सर्दै गएको दृश्य उनीहरूले अत्यन्त स्पष्ट रूपमा हेर्न पाए। उत्तरी इङ्ल्यान्ड, स्कटल्यान्ड र उत्तरी आयरल्यान्डमा भने आकाशमा बढी बादल थियो। तथापि त्यसले मानिसहरूलाई देशका विभिन्न प्रसिद्ध स्थलहरूमा भेला हुनबाट रोक्न सकेन।
चिलीकी वैज्ञानिक यास्मिन क्याट्रिचेओ उक्त परिघटना नियाल्न हजारौँ किलोमिटर यात्रा गरेर उत्तरपश्चिम स्पेन पुगेकी थिइन्। उनले भनिन्, “खग्रास सूर्यग्रहणको क्षणमा त्यहाँ उपस्थित सबै जना रमाएका थियौं। त्यो अनुभूतिलाई शब्दमा वर्णन गर्न सकिँदैन,” उनले भनिन्, “ब्रह्माण्ड अद्भुत छ।” सूर्य पृथ्वीबाट १५ करोड किलोमिटर टाढा छ। त्यो भनेको चन्द्रमाभन्दा करिब ४०० गुणा टाढा हो। तर चन्द्रमाको व्यास सूर्यको भन्दा ४०० गुणा सानो भएकाले पृथ्वीबाट हेर्दा दुवै लगभग ठ्याक्कै एउटै आकारका देखिन्छन्।
