नेपाल बास्केटबल संघले फिबा एसिया कप प्रि–क्वालिफायरका लागि सदीश प्रधानको कप्तानीमा १२ सदस्यीय नेपाली टोली घोषणा गरेको छ। विनोद महर्जन उपकप्तान बनेका छन् भने सुशील गुरुङ मुख्य प्रशिक्षक र आशिष न्यौपाने सहायक प्रशिक्षकको रूपमा नियुक्त भएका छन्।
फिबा एसिया कप प्रि–क्वालिफायर प्रतियोगिता दुबईमा आयोजना हुँदैछ, जहाँ नेपालले एसियाली स्तरको प्रतियोगितामा दाबेदारी प्रस्तुत गर्नेछ। टोलीमा श्रेयसबहादुर शाह, निश्चल महर्जन, अजय कुशवाहा, आशिम श्रेष्ठ, सौरव श्रेष्ठ, सुदीप पौडेल क्षेत्री, कमल थापा, साइमन गुरुङ, पेमा शेर्पा र प्रणय मान श्रेष्ठ रहेका छन्।
नेपाल फिबा एसिया कप प्रि–क्वालिफायरको समूह ए मा रहेको छ। समूहका खेलहरु अगष्ट २६ देखि ३१ सम्म युएईको दुबईमा हुनेछन्। नेपालले पहिलो खेल अगष्ट २६ मा युएईसँग खेल्नेछ, त्यसपछि अगष्ट २८ मा कुवेत, अगष्ट ३० मा बहराइन र सेप्टेम्बर १ मा ओमानसँग प्रतिस्पर्धा गर्नेछ।
फिबा एसिया कप प्रि–क्वालिफायरको समूह बी मा काजाखस्तान, प्यालेस्टाइन, श्रीलंका, माल्दिभ्स र किर्गिस्तान रहेका छन्। समूह सी मा इन्डोनेसिया, मलेसिया र सिंगापुर र समूह डी मा थाइल्यान्ड, मंगोलिया, भियतनाम र फिजी रहेका छन्। प्रि–क्वालिफायरको हरेक समूहबाट शीर्ष तीन टिम दोस्रो चरणमा प्रवेश गर्नेछन्।
