नबिल बैंकले ५.५ प्रतिशत ब्याजदर रहेको नबिल डिबेञ्चर २०९३ निष्कासनका लागि ग्लोबल आइएमई क्यापिटललाई बिक्री प्रबन्धकको रूपमा नियुक्त गरेको छ। बैंकले १ हजार अंकित मूल्यका ४० लाख कित्ता ऋणपत्र १० वर्षको अवधिका लागि जारी गर्दै ४ अर्ब रुपैयाँ संकलन गर्ने योजना बनाएको छ। यसमध्ये २४ लाख कित्ता व्यक्तिगत रूपमा र १६ लाख कित्ता सार्वजनिक निष्कासनमार्फत बिक्री गरिनेछ।
७ भदौ, काठमाडौं। नबिल बैंकले ५.५ प्रतिशत वार्षिक ब्याजदर रहेको नबिल डिबेञ्चर २०९३ नामक ऋणपत्र निष्कासनका लागि ग्लोबल आइएमई क्यापिटललाई बिक्री प्रबन्धकको रूपमा नियुक्त गरेको छ। मंगलबार भएको सम्झौतामा बैंकको तर्फबाट प्रमुख कार्यकारी अधिकृत मनोजकुमार ज्ञवाली र ग्लोबल आइएमई क्यापिटल लिमिटेडको तर्फबाट प्रमुख कार्यकारी अधिकृत मन्दीप लुइँटेलले हस्ताक्षर गरेका छन्।
बैंकले प्रत्येक ऋणपत्रको अंकित मूल्य १ हजार रुपैयाँ कायम गरी १० वर्ष अवधिका लागि ४० लाख कित्ता ऋणपत्र जारी गर्ने योजना बनाएको छ, जसबाट कुल ४ अर्ब रुपैयाँ संकलन गरिनेछ। यसमा २४ लाख कित्ता अर्थात् २ अर्ब ४० करोड रुपैयाँ बराबरको ऋणपत्र व्यक्तिगत रूपमा बिक्री गरिनेछ। त्यस्तै, १६ लाख कित्ता ऋणपत्र (जसमा ५ प्रतिशत अर्थात् ६५ हजार कित्ता सामूहिक लगानी कोष पनि समावेश छन्) सार्वजनिक निष्कासनमार्फत बिक्री गरिने बैंकले जनाएको छ।
नबिल बैंक निजी क्षेत्रको एक अग्रणी वाणिज्य बैंक हो, जसले २६ लाखभन्दा बढी ग्राहकलाई देशभरका २६३ शाखा सञ्जाल र ३१५ एटीएम मेसिनमार्फत सेवा प्रदान गर्दै आएको छ।
