सोलुखुम्बुको माप्य दुधकोशी गाउँपालिकाबाट आयोजित ‘एभरेस्ट भ्यु ट्रेल रेस’ लाई फ्रान्सस्थित प्रसिद्घ ‘अल्ट्रा ट्रेल’ संस्थाले अन्तर्राष्ट्रिय मान्यता प्रदान गरेको छ। अन्तर्राष्ट्रिय ट्रेल धावक सङ्घ (आईटीआरए)ले यस प्रतियोगितालाई तीन अङ्क प्रदान गरेको छ, जसले धावकहरूलाई विश्वका अन्य प्रतिष्ठित ट्रेल दौडहरूमा छनोट हुन सहयोग पुर्याउनेछ। गाउँपालिका अध्यक्ष बुद्धिकिरण राईले यस मान्यताले पर्यटन, प्रकृति, संस्कृति र साहसिक यात्रासँग जोडिने अभियान सफल भएको बताए। २४ भदौ, काठमाडौं।
सोलुखुम्बु जिल्लाको माप्य दुधकोशी गाउँपालिकाले आयोजना गरेको ‘एभरेस्ट भ्यु ट्रेल रेस’ले अन्तर्राष्ट्रिय मान्यता हासिल गरेको छ। पर्यटन प्रवर्द्धन, प्रकृति संरक्षण र खेलकुद विकासलाई जोड्दै सञ्चालन भइरहेको यस साहसिक दौडलाई फ्रान्सस्थित विश्वभरिको प्रसिद्ध ‘अल्ट्रा ट्रेल’ संस्थाले औपचारिक मान्यता दिएको हो। साथै, अन्तर्राष्ट्रिय ट्रेल धावक संघ (आईटीआरए)ले यस प्रतियोगितालाई तीन अङ्क प्रदान गरेको छ। मान्यता प्राप्त ट्रेल पूरा गर्ने धावकहरूले दूरी र उचाइको चुनौतीअनुसार प्राप्त गर्ने यी अंकहरूले विश्वका अन्य प्रतिष्ठित अन्तर्राष्ट्रिय ट्रेल दौडहरूमा छनोट हुन सहयोग गर्नेछन्।
अन्तर्राष्ट्रिय मान्यता प्राप्त भएपछि गाउँपालिका अध्यक्ष बुद्धिकिरण राईले यो सफलता खेलकुदलाई पर्यटन, प्रकृति, संस्कृति र साहसिक यात्रासँग जोड्ने अभियानका लागि महत्वपूर्ण भएको बताए। उनले भने, “यसले माप्य दुधकोशीका प्राकृतिक र सांस्कृतिक सम्पदाहरूलाई विश्व सामु चिनाउने अवसर थपेको छ।” करिब ४८ किलोमिटर लामो यो ट्रेलको अधिकतम उचाइ ३,१८१ मिटर र न्यूनतम उचाइ १,८०३ मिटर रहेको छ। प्रतियोगिता सम्पन्न गर्न धावकलाई अधिकतम ७ घण्टा ४५ मिनेटको समयसीमा तोकिएको छ। यो दौड निर्माणाधीन कोर्कु रंगशालाबाट सुरु भई महभीर, सिलगुडी, कुधम उच्च शिविर र कैलाशनाथ महादेव मन्दिर हुँदै फेरि कोर्कु रंगशालामा समाप्त हुनेछ। यात्राका क्रममा धावकले सगरमाथा, कञ्चनजङ्घा, नुम्बुर, थामसेर्कु र मेरा सहितका हिमश्रृंखलाहरूको मनोरम दृश्यावलोकन गर्न सक्नेछन् भने ब्लास झरना र महभीरजस्ता साहसिक स्थलहरू पनि ट्रेलको आकर्षण हुन्।
सम्बन्धित खबर
