संविधान दिवसको अवसरमा काठमाडौं शिक्षालय, ललितपुरले महालक्ष्मी नगरपालिकासँग सहकार्य गरी बाढीपीडित परिवारलाई सहयोग गर्ने उद्देश्यले २५ किलोमिटर साइकल र्याली आयोजना गर्दैछ। र्याली असोज ३ गते बिहान ७ बजेदेखि १० बजेसम्म इमाडोलबाट सुरु हुनेछ र करिब २०० जना सहभागी हुने अपेक्षा गरिएको छ। विद्यालयका अध्यक्ष प्रकाशराज पाण्डेले र्यालीको मुख्य उद्देश्य बाढीपीडित परिवारलाई सहयोग जुटाउनु र विद्यार्थी तथा युवामा सामाजिक उत्तरदायित्वको भावना जगाउनु रहेको जानकारी दिए।
र्यालीको सुरु इमाडोल, महालक्ष्मी–४ स्थित काठमाडौं शिक्षालयबाट हुनेछ र पुनः विद्यालयमै समाप्त हुनेछ। कार्यक्रममा महालक्ष्मी नगरपालिकाका प्रमुख हरिगोविन्द श्रेष्ठ प्रमुख अतिथि रूपमा सहभागी हुनेछन्। विद्यालय अध्यक्ष तथा पर्वतारोही प्रकाशराज पाण्डेका अनुसार हालै आएको बाढीबाट प्रभावित परिवारलाई सहयोग जुटाउनु र विद्यार्थी तथा युवामा सामाजिक उत्तरदायित्वको भावना विकास गर्नु र्यालीको मुख्य उद्देश्य हो।
र्यालीमा काठमाडौं शिक्षालयका विद्यार्थी, अभिभावक, शिक्षकहरू साथै आसपासका अन्य विद्यालयका विद्यार्थी र शिक्षकहरू र साइकलप्रेमीहरूले पनि सहभागिता जनाउनेछन्। आयोजकका अनुसार करिब २०० जना सहभागी हुने अपेक्षा गरिएको छ। प्रतियोगितामा सहभागीहरूको उमेरअनुसार दूरी तोकिएको छ। १० वर्षमुनिका सहभागीहरूले १० किलोमिटर, १५ वर्षसम्मका सहभागीहरूले १५ किलोमिटर र खुला तथा व्यवसायिक समूहले पूर्ण २५ किलोमिटर दूरी तय गर्नेछन्। र्यालीको मार्गले महालक्ष्मी नगरपालिकाका १ देखि १० वटै वडा समेट्ने भएको जनाइएको छ।
आयोजकहरूले स्थानीय सरकार, सुरक्षा निकाय, स्वास्थ्य संस्था, विद्यालय र समुदायसँग अभियान सफल बनाउन आवश्यक सहयोग र सहकार्यको अपील गरेका छन्। विद्यालयले “साइकल चलाऔँ, सहयोग जुटाऔँ, बाढीपीडित परिवारलाई साथ दिऔँ” भन्ने सन्देश सहित यस कार्यक्रमलाई केवल खेलकुद गतिविधि नभई मानवीय सहयोग अभियानको रूपमा अगाडि बढाएको जनाएको छ।
