अर्जेन्टिनाले मेसिलाई विदाइ खेलका लागि निम्तो दिएको

अर्जेन्टिनाले आगामी अक्टोबरमा ब्युनस आयर्सको मोनुमेन्टल रंगशालामा बेनिनविरुद्धको खेललाई लियोनेल मेसिको सम्भावित विदाइ खेलको रूपमा प्रस्ताव गरेको छ। अर्जेन्टिना फुटबल संघका अध्यक्ष क्लाउडियो तापियाले मेसिलाई अर्जेन्टिनामै योग्य विदाइ दिन चाहेको सामाजिक सञ्जालमार्फत बताएका छन्। ३९ वर्षीय मेसिले यस महिनाको सुरूमै अन्तर्राष्ट्रिय फुटबलबाट सन्यास घोषणा गरेका थिए, तर अक्टोबरको खेलबारे निर्णय सार्वजनिक गरेका छैनन्। ३१ भदौ, काठमाडौं। अन्तर्राष्ट्रिय फुटबलबाट सन्यास घोषणा गरेका लियोनेल मेसिलाई अर्जेन्टिनाले आगामी अक्टोबरमा हुने घरेलु मैत्रीपूर्ण खेलमा विशेष उपस्थिति जनाउन निम्तो दिएको छ। अर्जेन्टिना फुटबल संघ (एएफए) का अध्यक्ष क्लाउडियो तापियाले सामाजिक सञ्जालमार्फत विश्व फुटबलका उत्कृष्ट खेलाडी तथा राष्ट्रिय टोलीका कप्तान मेसिलाई अर्जेन्टिनामै योग्य विदाइ दिन चाहेको बताएका छन्। सन् २०२२ को विश्वकप उपाधि दिलाएका ३९ वर्षीय मेसिले यस महिनाको सुरूमै अन्तर्राष्ट्रिय फुटबलबाट सन्यासको घोषणा गरेका थिए। उनले भने अक्टोबरको उक्त खेल खेल्ने वा नखेल्नेबारे अझै निर्णय सार्वजनिक गरेका छैनन्। फिफाको सेप्टेम्बर–अक्टोबर अन्तर्राष्ट्रिय विन्डोमा अर्जेन्टिनाले तीन घरेलु मैत्रीपूर्ण खेल खेल्नेछ। त्यसक्रममा अक्टोबर ७ मा ब्युनस आयर्सस्थित मोनुमेन्टल रंगशालामा बेनिनविरुद्धको खेललाई मेसिको सम्भावित विदाइ खेलको रूपमा प्रस्ताव गरिएको छ। अर्जेन्टिनाले त्यसअघि बोलिभिया र बुर्किना फासोसँग पनि मैत्रीपूर्ण खेल खेल्नेछ।