डेनमार्कले उत्तरी सागरमा समुद्री सतहमुनि कार्बनडाइअक्साइड भण्डारण गर्ने ‘ग्रीन्स्यान्ड’ परियोजना सञ्चालनमा ल्याएको छ। ऊर्जा समूह आइएनइओएसले ग्रीन्स्यान्डलाई युरोपेली सङ्घको पहिलो पूर्ण क्षमताको कार्बनडाइअक्साइड भण्डारण स्थलको रूपमा प्रस्तुत गरेको छ। परियोजनाको पहिलो चरणमा निनी वेस्टको पुरानो तेल प्लेटफर्ममुनि प्रतिवर्ष चार लाख टन कार्बनडाइअक्साइड भण्डारण गरिनेछ।
२ असोज, कोपेनहेगन (रासस/एएफपी) – डेनमार्कले उत्तरी सागरमा समुद्री सतहमुनि कार्बनडाइअक्साइड भण्डारण गर्ने सुविधा सञ्चालनमा ल्याएको छ। आइएनइओएसका प्रमुख कार्यकारी डेभिड बकनलले ग्रीन्स्यान्डलाई युरोपेली सङ्घ (इयु) को पहिलो पूर्ण क्षमताको कार्बनडाइअक्साइड भण्डारण स्थल भनेका छन्। उनका अनुसार, यसले युरोपभरिका यस्ता परियोजना विस्तारका लागि आधार तयार गर्नेछ।
संयुक्त राष्ट्रसङ्घीय जलवायु परिवर्तनसम्बन्धी अन्तरसरकारी प्यानल (आइपिसिसी) र अन्तर्राष्ट्रिय ऊर्जा एजेन्सी (आइइए) ले सिमेन्ट र स्टिलजस्ता उद्योगबाट हुने कार्बन उत्सर्जन घटाउन सिसिएस प्रविधिलाई प्रभावकारी उपायका रूपमा स्वीकार गरेका छन्। यद्यपि, यो प्रविधि जटिल र महँगो मानिन्छ। डेनमार्कको पश्चिमी तटबाट करिब २०० किलोमिटर टाढा रहेको ग्रीन्स्यान्डको भण्डारणस्थल निनी वेस्टको पुरानो तेल प्लेटफर्ममुनि छ।
आइएनइओएसले सन् २०३० सम्ममा क्षमता विस्तार गरी वार्षिक ४० लाखदेखि ८० लाख टनसम्म पुर्याउने योजना बनाएको छ। कार्बनडाइअक्साइड मुख्यतः डेनमार्कका बायोमिथेन उत्पादन केन्द्रबाट सङ्कलन गरी तरलीकृत अवस्थामा एस्बेर्ज बन्दरगाहबाट जहाजमार्फत भण्डारण स्थलसम्म पुर्याइनेछ। युरोपेली सङ्घ (इयु) ले नेट–शून्य उद्योग ऐनअन्तर्गत सन् २०३० सम्ममा वार्षिक कम्तीमा पाँच करोड टन कार्बनडाइअक्साइड भण्डारण क्षमता विकास गर्ने लक्ष्य लिएको छ। यसअघि छिमेकी नर्वेको ‘नर्दर्न लाइट्स’ परियोजनाले सन् २०२५ अगस्टमा समुद्रको पिँधमुनि रहेको चट्टानी तहमा कार्बनडाइअक्साइड भण्डारण सुरु गरेको थियो।
