अस्ट्रेलियाले संयुक्त राष्ट्रसंघ सुरक्षा परिषद् सदस्य बन्नका लागि अभियान सुरु गर्यो

अस्ट्रेलियाले सन् २०२९–३० को दुईवर्षे कार्यकालका लागि संयुक्त राष्ट्रसंघ सुरक्षा परिषद्को अस्थायी सदस्य बन्न औपचारिक अभियान सुरु गरेको छ। प्रधानमन्त्री एन्थोनी अल्बानिजीले न्युयोर्कमा उम्मेदवारी घोषणा गर्दै शान्ति, जलवायु, समुद्री सुरक्षा र कृत्रिम बुद्धिमत्तामा भूमिकामा जोड दिएका छन्। संयुक्त राष्ट्रसंघको महासभाले सन् २०२८ जूनमा गोप्य मतदान गरेर सुरक्षा परिषद्का अस्थायी सदस्य चयन गर्नेछ, जसका लागि दुई तिहाइ मत आवश्यक पर्नेछ। ५ असोज, काठमाडौं।

अस्ट्रेलियाले सुरक्षा परिषद्मा रहेर अन्तर्राष्ट्रिय शान्ति तथा सुरक्षा, द्वन्द्व रोकथाम, जलवायु तथा समुद्री सुरक्षा र कृत्रिम बुद्धिमत्ता लगायतका विषयमा भूमिका खेल्ने बताएको छ। अल्बानिजीले विश्वका विभिन्न ठाउँमा भइरहेका द्वन्द्व तथा अन्य अन्तर्राष्ट्रिय घटनाले अस्ट्रेलियाको सुरक्षा, अर्थतन्त्र र नागरिकको दैनिक जीवनमा समेत असर पार्ने उल्लेख गर्दै विश्व मामिलामा सकृय सहभागिता आवश्यक रहेको बताएका छन्।

अस्ट्रेलियाले सुरक्षा परिषद्को सदस्य बनेमा साना तथा मध्यम आकारका राष्ट्रहरूको आवाज निर्णय प्रक्रियामा प्रभावकारी रूपमा उठाउने दाबी गरेको छ। अभियानको नारा ‘वी लिस्सन, वी पार्टनर, वी प्रोटेक्ट’ रहेको छ। सन् २०२८ जूनमा मतदान गरी सन् २०२९–३० को कार्यकालका लागि सुरक्षा परिषद्का अस्थायी सदस्य छनोट गरिनेछ।

अस्ट्रेलिया यसअघि पाँचपटक संयुक्त राष्ट्रसंघ सुरक्षा परिषद्को अस्थायी सदस्य भइसकेको छ। पछिल्लो पटक उसले सन् २०१३–१४ मा सदस्यको रूपमा काम गरेको थियो। यसपटक निर्वाचित भएमा अस्ट्रेलियाले अन्तर्राष्ट्रिय शान्ति तथा सुरक्षा र बहुपक्षीय सहकार्यका क्षेत्रमा आफ्नो भूमिका थप्ने लक्ष्य राखेको छ।