पूर्वी कङ्गोको किभु तालमा डुङ्गा पल्टिँदा १२ जनाको मृत्यु, दर्जनौँ बेपत्ता
पूर्वी कङ्गोको किभु तालमा व्यापारी बोकेको डुङ्गा पल्टिँदा कम्तीमा १२ जनाको मृत्यु भएको छ भने दर्जनौँ यात्रु बेपत्ता भएका छन्। दुर्घटनामा ५० भन्दा बढी व्यक्ति सवार थिए र करिब १५ जनालाई सकुशल उद्धार गरिएको किशेके गाउँका प्रमुख फेलिक्स हाबिरागीले बताए।
स्थानीय प्रशासक मुहिन्डो नताम्बुका पास्कलका अनुसार डुङ्गा इड्ज्वी टापुको बुविनाबाट बोजातर्फ माछा व्यापारी र सामान ओसारपसार गरिरहेको थियो। शनिबार राति साउथ किभु प्रान्तस्थित इड्ज्वी टापु नजिक डुङ्गा दुर्घटनामा परेको हो। हाबिरागीले हालसम्म करिब १५ जनाको सकुशल उद्धार गरिएको जानकारी दिनुभयो।
दुर्घटनाको कारण भने तत्काल खुल्न सकेको छैन। कङ्गोमा डुङ्गा दुर्घटनाबाट हुने मानवीय क्षति बारम्बार हुने गरेको छ। १० करोडभन्दा बढी जनसङ्ख्या भएको यस देशमा नदी र तालहरू यातायातका प्रमुख माध्यम भएकाले यस्ता दुर्घटनाहरू पटक–पटक हुने गरेका छन्।
