१२ असोज, काठमाडौं । अमेरिकाका अलराउन्डर शुभम रन्जानेले तेस्रो संस्करणको नेपाल प्रिमियर लिग (एनपीएल) मा फेरि विराटनगर किङ्सबाट खेल्ने निर्णय गरेका छन्। विराटनगर किङ्सले सोमबार सामाजिक सञ्जालमार्फत रन्जानेलाई अनुबन्ध गरेको जानकारी सार्वजनिक गरेको छ। ३२ वर्षिय रन्जाने दायाँहाते ब्याटिङ र मिडियम पेस बलिङमा दक्ष खेलाडी हुन्। उनले हालसम्म टी-२० क्रिकेटमा ७४ खेल खेलेर ११७७ रन जोडेका छन् भने २९ विकेट पनि टिप्न सफल भएका छन्। यसअघि विराटनगर किङ्सले श्रीलंका प्रमुख खेलाडी चरिथ असलंकलाई पनि अनुबन्ध गरिसकेको छ। नेपाल प्रिमियर लिगको तेस्रो संस्करण कात्तिक ९ गतेदेखि मंसिर ५ गतेसम्म आयोजना गरिनेछ।
