रूसी राष्ट्रपति कार्यालय क्रेमलिनले इरानलाई परमाणु अप्रसार सन्धि (एनपीटी) बाट बाहिरिन नदिन आग्रह गरेको छ। बीबीसी फारसीका अनुसार, क्रेमलिनका प्रवक्ता दिमित्री पेस्कोभले इरानी अधिकारीहरूले तेहरान एनपीटीबाट बाहिरिन सक्ने सम्भावना व्यक्त गरेपछि यसप्रति प्रतिक्रिया दिएका हुन्। एनपीटीले इरानलाई परमाणु हतियार विकास वा हात पार्न रोक लगाउँछ। इरान सन् १९६० देखि यस सन्धिको सदस्य रहेको छ।
मंगलबार इरानी संसदका उपाध्यक्ष अली निकजादले संसद्ले इरानलाई एनपीटीबाट बाहिराउने तीन चरणीय योजना माथि विचार गर्न लागेको बताएका थिए। ‘हामीलाई अन्तर्राष्ट्रिय परमाणु ऊर्जा एजेन्सी (आईएईए) र यसका वर्तमान महानिर्देशकप्रति पूर्ण विश्वास छैन। उनीहरू केवल औपचारिक भ्रमण गर्छन् र इरानविरुद्ध नकारात्मक प्रतिवेदन दिन्छन्,’ इरानी सञ्चारमाध्यमका अनुसार निकजादले भनेका थिए। ‘यस योजनालाई समीक्षा गर्नुका साथै संसद्ले यसको अन्तर्राष्ट्रिय पक्षको पनि समीक्षा गर्नेछ।’
क्रेमलिनका प्रवक्ता पेस्कोभले इरानको धारणा स्पष्ट हुनुपर्छ भनेका छन्। उनले भने, ‘हामी एनपीटीलाई परमाणु अप्रसार व्यवस्थाको आधार मान्छौं। हामी आशा गर्छौं इरान यस सन्धिको एक महत्वपूर्ण र जिम्मेवार सदस्यको रूपमा रहनेछ।’ यसअघि सोमबार इरान सरकारका ३० भन्दा बढी पूर्व अधिकारीहरूले खुला पत्र जारी गरी इरानलाई एनपीटीबाट बाहिरिन आग्रह गरेका थिए। पत्रमा हस्ताक्षर गर्नेहरूमा पूर्व उपराष्ट्रपति र पूर्व मन्त्रीहरू पनि छन् जसले एनपीटीको सदस्यता देशको हितमा नरहेको बताएका छन्।
