दुई पाइलटबीचको ‘हिंसात्मक घटना’पछि फ्लाई दुबईको विमान साउदी अरेबिया तर्फ मोडियो

१४ असोज, काठमाडौं । यूएईको दुबईबाट इजरायलको तेल अवीवतर्फ उडेको फ्लाई दुबईको विमानमा दुई पाइलटबीच ‘हिंसात्मक घटना’ भएपछि सो विमानलाई साउदी अरेबियातर्फ डाइभर्ट गरिएको स्रोतलाई उद्धृत गर्दै सीएनएनले जनाएको छ। विमान ३४ हजार फिट उचाइमा उडिरहेको बेला करिब दुई मिनेटमै १६ हजार ६ सय फिटको आसपासमा झरेको थियो। उडान ट्र्याकिङ तथ्यांकअनुसार यो घटना स्थानीय समयअनुसार राति करिब १ बजेर २० मिनेटमा भएको थियो।

घटनाको करिब १२ मिनेटपछि विमानबाट आपत्कालीन संकेत पठाइएको थियो। त्यसपछि विमानलाई साउदी अरेबियातर्फ मोडिएको हो। इजरायली अधिकारीहरूले यो घटना विमान अपहरण नभएको बताएका छन्। उनीहरूले बताए अनुसार यो घटना विमानभित्रका कर्मचारीबीच भएको विवादको रूपमा बुझिएको छ। आपत्कालीन संकेत प्राप्त भएपछि इजरायलका प्रधानमन्त्री र रक्षामन्त्रीले सुरक्षा विषयमा परामर्श गरेका थिए।

इजरायली रक्षा बल (आईडिएफ) का प्रवक्ता अनुसार घटनापछि इजरायली लडाकू विमानसमेत परिचालन गरिएको थियो। फ्लाई दुबईको विमान केही समयमा साउदी अरेबियामा अवतरण गर्ने अपेक्षा गरिएको छ। घटनाबारे फ्लाई दुबईको प्रतिक्रियाका लागि सीएनएनले सम्पर्क गरेको छ।