अमेरिकी राष्ट्रपति डोनाल्ड ट्रम्पले इरानले होर्मुज स्ट्रेट खोल्ने विषयमा गरेको प्रस्ताव आफूहरूका लागि पर्याप्त नभएको बताएका छन्। समयपत्रिकालाई दिएको विस्तृत अन्तर्वार्तामा ट्रम्पले इरानसँग जारी युद्ध, वार्ताको सम्भावना र होर्मुज स्ट्रेटको अवस्थाबारे धारणा राखेका हुन्। केही दिनअघि लिइएको उक्त अन्तर्वार्ता बिहीबार प्रकाशित भएको हो।
ट्रम्पका अनुसार, इरानको अवस्था निकै खराब छ। अर्थतन्त्र कमजोर हुँदै गइरहेको र इरान सम्झौता गर्न चाहिरहेको दाबी गर्दै उनले आफूले भनेका ‘वास्तविक सम्झौता’ चाहेको बताए। उनले मध्यावधि निर्वाचनपछि इरानमाथि पुनः आक्रमण हुनसक्ने सम्भावना पनि रहेको बताए। ‘मैले एक वर्षअघि अस्वीकार गरेको विषयमा अहिले सहमत हुनेछैन। इरान ध्वस्त हुनसक्छ र त्यो सम्भव छ,’ ट्रम्पले भने।
होर्मुज स्ट्रेट खोल्ने विषयमा इरानले प्रस्ताव गरेको बताउँदै उनले त्यसका केही पक्ष आफूले हेरेको तर सबै पक्ष नहेरेको बताए। ‘यो प्रस्ताव पर्याप्त छैन,’ उनले थपे। ट्रम्पले अमेरिकासँग ठूलो मात्रामा हतियार रहेको र अहिले ठूलो परिमाणमा हतियार भण्डारण गरिरहेको बताए। ती हतियार आफ्ना सहयोगी देशलाई वितरण गरिने उनको भनाइ छ। अमेरिकी सेनासँग गोलाबारुदको अभाव रहेको भन्ने समाचारहरू अधिकांश ‘झुटा समाचार’ भएको पनि उनले दाबी गरे।
ट्रम्पले इरानलाई आणविक हतियार राख्न अनुमति दिन नसकिने बताए। उनका अनुसार इरानले आणविक हतियार प्राप्त गर्न नहुने र त्यसलाई रोक्नुपर्नेछ। इरानसँग सम्झौता भएपछि तेलको मूल्य यसअघि जस्तै घट्ने पनि ट्रम्पले बताएका छन्।
