१९ असोज, जेरुसालेम (रासस/सिन्ह्वा)। इजरायल रक्षा मन्त्रालयले सन् २०२३ अक्टोबर ७ मा सुरु भएको द्वन्द्वयता तीन वर्षभित्र सैनिक, सुरक्षाकर्मी तथा उद्धारकर्मीहरू सहित १,३१८ जनाको मृत्यु भएको जनाएको छ। मन्त्रालयले हमास नेतृत्वको आक्रमणको तेस्रो वार्षिकोत्सव अघि आइतबार सार्वजनिक गरेको तथ्याङ्कमा यस्तो विवरण समावेश गरिएको छ। मन्त्रालयका अनुसार मृतकमा सैनिक, प्रहरी अधिकारी, सिन बेट आन्तरिक सुरक्षा निकायका कर्मचारी, जेल सेवाका कर्मचारी, अग्निनियन्त्रक, उद्धारकर्मी, स्थानीय सुरक्षा संयोजक र आपत्कालीन प्रतिक्रिया टोलीका सदस्यहरू छन्। यो तथ्याङ्कमा अक्टोबर ७ को आक्रमणपछि गाजा, कब्जा गरिएको पश्चिम किनारा, लेबनान, सिरिया र इराकमा इजरायलले सञ्चालन गरेका सैन्य कारबाही तथा यमनमा इरान र हुथी समूह विरुद्ध गरिएका कारबाहीमा मारिएका सुरक्षाकर्मीहरू पनि समावेश छन्।
सन् २०२३ अक्टोबर ७ मा हमास नेतृत्वको आक्रमणमा करिब १,२०० जनाको मृत्यु र २५१ जनालाई बन्धक बनाइएको इजरायलले जनाएको थियो। त्यसपछि इजरायलले गाजा पट्टीमा सैन्य कारबाही सुरु गरेको थियो र यो पछि क्षेत्रका अन्य स्थानहरूमा समेत फैलिएको थियो। यस अवधिमा गाजामा इजरायली सैन्य कारबाहीबाट ७४,७२२ भन्दा बढी प्यालेस्टिनीहरूको मृत्यु र १,७५,१८८ जना घाइते भएको गाजाको स्वास्थ्य मन्त्रालयले शनिबार जनाएको छ। संयुक्त राष्ट्रसंघीय राहत तथा कार्य एजेन्सी (युएनआरडब्ल्यूए)का अनुसार गाजाका करिब ८२ प्रतिशत संरचना, लगभग दुई लाख भवनहरू, क्षतिग्रस्त भएका छन्। तीमध्ये करिब दुईतिहाइ पूर्ण रूपमा ध्वस्त भएका छन्।
पूर्वी जेरुसालेमसहित अधिकृत प्यालेस्टिनी क्षेत्रमा संयुक्त राष्ट्रसंघको स्वतन्त्र अन्तर्राष्ट्रिय अनुसन्धान आयोगले सन् २०२५ सेप्टेम्बरमा इजरायलले गाजामा प्यालेस्टिनीविरुद्ध नरसंहार गरिरहेको निष्कर्षसहितको प्रतिवेदन सार्वजनिक गरेको थियो। आयोगले गाजामा भइरहेका अत्याचार तत्काल रोक्न इजरायललाई आह्वान गरेको थियो। द्वन्द्व गाजाबाहिर पनि फैलिएको छ। लेबनानको स्वास्थ्य मन्त्रालयले गत जुनमा सन् २०२४ मार्च २ यता इजरायली आक्रमणमा चार हजार ५७ जनाको मृत्यु र १२,१२१ जना घाइते भएको जनाएको थियो। इरानमा सरकारी समाचार संस्था इरनाले अप्रिलमा इरानी अधिकारीलाई उद्धृत गर्दै इजरायल र अमेरिकाविरुद्ध ४० दिन चलेको द्वन्द्वमा तीन हजार ४६८ जनाको मृत्यु भएको जनाएको थियो। मृतकमध्ये एक हजार ४६० जना सर्वसाधारण रहेको उल्लेख गरिएको थियो।
कब्जा गरिएको पश्चिम किनारामा पनि हिंसा बढेको छ। संयुक्त राष्ट्रसंघको तथ्याङ्कअनुसार सन् २०२३ अक्टोबर ७ देखि सन् २०२६ जुलाई २४ सम्म त्यहाँ एक हजार ११२ प्यालेस्टिनी मारिएका छन्। सिरियामा बशर अल-असद सरकारको पतनपछि इजरायली सेना इजरायल र सिरियाबीचको बफर क्षेत्रमा प्रवेश गरेको छ। सन् १९७४ को विच्छेद सम्झौताअन्तर्गत स्थापित उक्त क्षेत्र संयुक्त राष्ट्रसंघको निगरानीमा रहेको असैन्यीकृत क्षेत्र हो। यसैबीच, अन्तर्राष्ट्रिय फौजदारी अदालतले सन् २०२४ नोभेम्बरमा इजरायली प्रधानमन्त्री बेन्जामिन नेतान्याहु र तत्कालीन रक्षामन्त्री योव ग्यालेन्टविरुद्ध युद्ध अपराध तथा मानवताविरुद्धका अपराधको आरोपमा पक्राउ पुर्जी जारी गरेको थियो। इजरायलले उक्त निर्णय अस्वीकार गर्दै आएको छ।
