काठमाडौं । नेपाली कांग्रेसको १५औँ महाधिवेशनबाट निर्वाचित केन्द्रीय कार्यसमितिका पदाधिकारी र सदस्यहरूले पद तथा गोपनीयताको शपथ ग्रहण गरेका छन्। बिहीबार पार्टी केन्द्रीय कार्यालय सानेपामा केन्द्रीय निर्वाचन समितिले आयोजना गरेको विशेष समारोहमा सभापति गगनकुमार थापाले नवनिर्वाचित पदाधिकारी र केन्द्रीय सदस्यहरूलाई शपथ गराउनुभएको हो।
असोजको अन्तिम साता सम्पन्न महाधिवेशनबाट सभापतिमा निर्वाचित थापाले यसअघि नै बडादशैँको फूलपातीका दिन शपथ ग्रहण गरी पदभार सम्हालिसक्नुभएको थियो। थापाले ६ हजार ५८४ मत प्राप्त गर्दा प्रतिस्पर्धी श्यामकृष्ण खड्गीले ३७५ मत मात्र प्राप्त गर्नुभएको थियो। १५औँ महाधिवेशनबाट कांग्रेसको केन्द्रीय कार्यसमितिमा कुल २३१ जना निर्वाचित भएका थिए।
बिहीबारको समारोहमा उपस्थित भएका पदाधिकारी र केन्द्रीय सदस्यहरूले औपचारिक रूपमा शपथ लिएका छन्। निर्वाचन समितिका सदस्य सचिव राजु कटुवालका अनुसार विभिन्न कारणले समारोहमा उपस्थित हुन नसकेका पदाधिकारी र केन्द्रीय सदस्यहरूलाई पछि पार्टीको आन्तरिक व्यवस्थाअनुसार शपथ गराइनेछ। विदेशमा रहेका नेपाली जनसम्पर्क समितिका प्रतिनिधिहरूले भर्चुअल माध्यमबाट शपथ ग्रहण कार्यक्रममा सहभागी हुने जानकारी पनि निर्वाचन समितिलाई गराएका छन्।
सम्बन्धित खबर
