३० साउन, काठमाडौं । इन्डोनेसियामा शक्तिशाली भूकम्पले कम्तीमा ३८ जनाको ज्यान गएको छ । त्यहाँको डिजास्टर मिटिगेसन एजेन्सीका अनुसार शनिबार बिहान ७.७ रेक्टर स्केलको भूकम्प गएको थियो । भूकम्पपछि उद्धारकार्य सुरु हुँदा मृतकको संख्या बढिरहेको छ । स्थानीय समय अनुसार बिहान ५ बजेतिर आएको मुख्य झट्कापछि दर्जनौं पराकम्पहरू पनि आइसकेका छन् । तीमध्ये एक पराकम्पको तीव्रता ६.१ रेक्टर स्केलसम्म पुगेको बताइएको छ । ठूलो झट्काका कारण सयौं घरहरूमा क्षति पुगेको छ र भूकम्पपछिको ठूलो भागदौडका खबरहरू पनि प्राप्त भएका छन् ।
