हार्दिक फिटनेसले २९औं वार्षिकोत्सवको अवसरमा पहिलोपटक पिकलबल र खुल्ला टेबलटेनिस प्रतियोगिता आयोजना गरेको छ। पिकलबल पुरुष एकलमा सुवर्ण शाह र प्रनव खनाल फाइनलमा पुगेका छन् भने पुरुष डबलमा लक्ष्यविक्रम शाह र अनिस अधिकारीको जोडी उपाधि भिडन्तमा पुगेको छ। टेबलटेनिस पुरुष एकलमा प्रजिल भट्टराई र हिमाल विष्ट, महिला एकलमा वियान्का राई र दिया देउला तथा भेटरान्स एकलमा चन्दन शाही र ठाकुर थापा फाइनलमा पुगेका छन्। १५ भदौ, काठमाडौं।
हार्दिक फिटनेसले पुल्चोकमा पहिलो पटक पिकलबल प्रतियोगिता आयोजना गरेको हो। शुक्रबार पुरुष एकल पिकलबलमा सुवर्ण शाह र प्रनव खनाल फाइनलमा पुगेका छन्। पुरुष डबल पिकलबलमा लक्ष्यविक्रम शाह र अनिस अधिकारीको जोडीले सुवर्ण शाह र समीर पोखरेलको जोडीसँग उपाधि भिडन्त गर्ने तयारी गरेको छ। टेबलटेनिसमा ७१ पुरुष, २२ महिला र ४२ भेटरान्स गरी कुल १३५ खेलाडीले सहभागिता जनाएका छन्।
दुवै खेलका प्रत्येक ईभेन्टमा विजेतालाई ३० हजार, उपविजेतालाई १५ हजार र तेस्रो स्थान बनाउनेलाई पाँच हजार रुपैयाँ पुरस्कार प्रदान गरिनेछ। हार्दिक फिटनेसका अपरेशन्स मेनेजर विपिन महर्जनले दुवै खेलमा सहभागिता हुनु र पहिलोपटक पिकलबल आयोजना गर्नु इतिहासको रुपमा रहेको बताए। “यस प्रतियोगितामा राष्ट्रिय तथा अन्तर्राष्ट्रिय खेलाडीहरुको पनि सहभागिता छ, जसले यसअवसरलाई विशेष बनाएको छ,” उनले भने। हार्दिक फिटनेसका सञ्चालक विराज विष्टले पहिलोपटक पिकलबल प्रतियोगिता आयोजना गर्न पाएकोमा खुशी व्यक्त गरे।
