आसिफ शेखले मलेसियाको क्वालालम्पुरमा जारी एसीसी प्रिमियर कपको फाइनलमा युएईविरुद्ध आफ्नो दोस्रो एकदिवसीय शतक पूरा गरेका छन्। उनले १०६ बल खेल्दै ८ चौका र ४ छक्का सहित १०२ रन बनाए। शतक पूरा गरेपछि उनलाई १०२ रनमा आउट गरियो। आसिफले अर्जुन कुमालसँग पहिलो विकेटका लागि ९७ रनको महत्वपूर्ण साझेदारी पनि गरेका थिए।
आसिफ नेपालका लागि एकदिवसीय क्रिकेटमा दुई शतक प्रहार गर्ने चौथा खेलाडी बनेका छन्। यसअघि रोहित पौडेल, कुशल भुर्तेल र दीपेन्द्र सिंह ऐरीले पनि दुई-दुई शतक बनाइसकेका छन्। आसिफले ७६ एकदिवसीय खेल खेल्दै २ शतक र १५ अर्धशतकसहित कुल २,१७४ रन बनाइसकेका छन्। उनी नेपालका लागि एकदिवसीय क्रिकेटमा सबैभन्दा धेरै रन बनाउने दोस्रो धावक हुन्। पहिलो स्थानमा रोहित पौडेल रहेका छन् जसले २,३४४ रन बनाएका छन्।
