बंगलादेश क्रिकेट बोर्डले सन् २०२७ भित्र नेपालसँग द्विपक्षीय क्रिकेट शृङ्खला आयोजना गर्ने तयारी गरिरहेको जनाएको छ। नेपाल क्रिकेट संघ (क्यान) को प्रस्तावलाई सकारात्मक दृष्टिले लिइएको बीसीबीले फ्युचर टुर्स प्रोग्रामभित्र समय मिलाएर शृङ्खला सम्पन्न गर्ने प्रयास जारी रहेको बताएको छ। बीसीबीका क्रिकेट सञ्चालन प्रमुख शाहरियार नाफिसले प्रगति भएपछि औपचारिक घोषणा गरिने र नेपालसँग अहिलेसम्म द्विपक्षीय शृङ्खला नरहेको समेत बताए। २७ भदौ, काठमाडौं।
बंगलादेश क्रिकेट बोर्डले नेपालसँग सन् २०२७ भित्र द्विपक्षीय क्रिकेट शृङ्खला आयोजना गर्ने तयारी गरिरहेको जनाएको छ। नेपाल क्रिकेट संघ (क्यान) बाट आएको शृङ्खलाका लागि प्रस्तावलाई सकारात्मक रूपमा लिईएको उल्लेख गर्दै बीसीबीले दुबै बोर्डबीच औपचारिक छलफल भइरहेको पुष्टि गरेको छ। क्रिकेट सञ्चालन प्रमुख शाहरियार नाफिसले शनिबार पत्रकारहरूसँग कुरा गर्दै नेपालले केही समयअघि द्विपक्षीय शृङ्खला खेल्न औपचारिक प्रस्ताव पठाएको बताए।
“क्यानले बंगलादेशसँग द्विपक्षीय शृङ्खला खेल्ने इच्छा व्यक्त गर्दै प्रस्ताव पठाएको थियो। हामीले त्यसलाई निकै सकारात्मक रूपमा लिएका छौँ,” नाफिसले भने। उनका अनुसार अन्तर्राष्ट्रिय क्रिकेट परिषद् (आईसीसी) को फ्युचर टुर्स प्रोग्राम (एफटीपी) व्यस्त रहे पनि वर्तमान चक्रभित्र उपयुक्त समय मिलाएर शृङ्खला आयोजना गर्ने प्रयास भइरहेको छ।
“वर्तमान चक्र सन् २०२७ सम्मको हो। हाम्रो उद्देश्य यही चक्रभित्र नेपालसँग शृङ्खला खेल्नु हो। समय मिल्यो भने यो शृङ्खला अवश्य सम्पन्न हुनेछ,” उनले थपे। नेपाल र बंगलादेशबीच अहिलेसम्म कुनै द्विपक्षीय अन्तर्राष्ट्रिय शृङ्खला भएको छैन। यसअघि ढाकामा नेपालका राजदूत घनश्याम भण्डारीले बंगलादेशका युवा तथा खेलकुद राज्यमन्त्री अमिनुल हकसँग भेट गर्दै टी–२० शृङ्खला आयोजना गर्न आग्रह गरेका थिए। नाफिसले शृङ्खलाबारे थप प्रगति भएपछि औपचारिक घोषणा गरिने जानकारी दिए। साथै उनले हाल बंगलादेशले एसियाली खेलकुद र अफगानिस्तानविरुद्धको आगामी शृङ्खलाको तयारी समानान्तर रुपमा अघि बढाइरहेको पनि बताए।
सम्बन्धित खबर
