फिफाले पंकजविक्रम नेम्बाङको कमिटीलाई आधिकारिकता दिएको एन्फा महासचिव किरण राइको भनाइ

अखिल नेपाल फुटबल संघ (एन्फा) नेतृत्वले अन्तर्राष्ट्रिय फुटबल महासंघ (फिफा)ले उनीहरूलाई आधिकारिक रूपमा मान्यता दिएको दाबी गरेको छ। एन्फाले बिहीबार आयोजना गरेको पत्रकार सम्मेलनमा महासचिव किरण राइले भन्नु भयो, “फिफाले पंकजविक्रम नेम्बाङको कमिटीलाई आधिकारिक मान्छ। त्यस अनुसार हामी निलम्बित छौं, बर्खास्त छैनौं। कुराकानी सम्भव छ।” राइले सरकारले दिएको निर्देशनको कारण खेलाडी तथा कर्मचारीहरूको तलब रोकिएको उल्लेख गर्दै सरकारसँग स्पष्ट निर्देशनको माग गरेका छन्।

राइले बुधबार सरकार र अध्यक्ष नेम्बाङसँगको वार्तालाप सकारात्मक नभएको बताउँदै भने, “कि त सरकारले हामीलाई स्पष्ट निर्देशन दिएर अगाडि नबढ्न भन्नुपर्छ। खेलाडीहरूको परिवारको जिम्मेवारी कसले लिने भन्ने विषयमा एक टुंगोमा पुग्नुपर्छ।” उनले समस्याको विषयमा सरकारले स्पष्ट निर्देशन दिनुपर्ने धारणा व्यक्त गरे।

महासचिव राइले थपे, “कर्मचारीहरूलाई पनि स्पष्ट जानकारी दिनुपर्छ। नत्र देखा परेका समस्याहरू समाधान गरी अगाडि बढ्नुपर्‍यो।” साथै सरकारसँग वार्ता भएमा फिफासहित त्रिपक्षीय बैठकको प्रस्ताव गर्न सकिने बताएका छन्।